Me kërkesë të policisë federale belge, të gjitha forcat policore europiane janë vënë në kërkim të Haredin Fejzulla, 58 vjeç, shqiptari i arratisur, i cili fitoi miliona euro nga tregtia e drogës në Belgjikë. Prej kësaj fundjave, përshkrimi i tij është në listën e Europol-it, në listën e më të kërkuarve në Europë.
Haredin Fejzulla tërhoqi vëmendjen e hetuesve në verën e vitit 2013. Policia e Brukselit ndaloi një makinë gjatë një kontrolli rutinë më 29 gusht. Në mjet ndodheshin katër shqiptarë: Leonard Z., një burrë që më vonë do të identifikohej si drejtuesi i bandës shqiptare, ushtari i tij besnik Fejzulla dhe dy të tjerë. Gjithashtu, hetuesit gjetën në automjet edhe 108 gramë kanabis, gjë që nxiti autoritetet të hetojnë më tej pasagjerët.
Hetimi i mëtejshëm me vëzhgime dhe përgjime telefonike çoi në një bandë shqiptare që kishte ngritur dhjetëra plantacione të paligjshme kanabisi në kryeqytet dhe në periferi të Brukselit midis 2013 dhe 2019. Të paktën 22 plantacione u gjetën nga policia.
Banda rreth Fejzullait kishte gjetur një mënyrë të veçantë për t’i fshehur ato plantacione. Me letra false, ata kontrolluan tregun e qirave në kërkim të shtëpive të përdorshme. Ata nënshkruan një kontratë qiraje. Pa dijeninë e pronarit, më pas në shtëpi ngriheshin plantacionet e kanabisit.
Një gjyq i vitit 2021 kundër Fejzullait zbuloi se 13 nga plantacionet gjeneruan rreth katër milionë euro, para të cilat besohet se u riinvestuan nga banda.
Haredin Fejzulla ka lindur në Shqipëri, por ka jetuar në Belgjikë për shumë kohë. E gjithë familja e tij ishte e përfshirë në organizim. Me 3 vite burg u dënua edhe djali i tij 31-vjeçar, si ndihmës logjistik dhe roje i plantacioneve.
Vetë Fejzulla ndodhet në arrati që prej 22 shtatorit 2014: që prej asaj kohe ai nuk është parë më në Belgjikë nga policia. Fejzulla shpesh prezantohej si grek dhe përdorte pseudonime greke si ‘Spiros’, ‘Robotis Postolis’ ose ‘Vasileios Samaras’.
Gjykata belge e ka nxjerrë tri herë para gjykatës së Brukselit. Çdo herë ai është dënuar në mungesë për trafik narkotikësh dhe si drejtues i një organizate kriminale. Tani atij i duhet të vuajë gjithsej 18 vite burg , ndërsa policia i ka konfiskuar 1.365.000 euro.
Tashmë dyshohet se Fejzulla është shpërngulur jashtë Belgjikës dhe operon nga vende të tjera evropiane. Ekipi i Kërkimit Aktiv të të Arratisurve (FAST) i policisë federale belge po gjurmon shqiptarin dhe e ka vendosur atë zyrtarisht në listën e më të kërkuarve të Europës këtë fundjavë.
