Elton Myrtaj oficer i Policisë kriminale në Shkodër, është mësuar të ketë dhënë dorëheqjen nga radhët e policisë. Mësohet se vendimi i oficerit Myrtaj për t’u larguar nga policia është ndikuar nga bisedat e fundit të zbardhura në dosjen “Metamorfoza”. Në përgjime doli se puna e tij hetimore është trukuar duke u shitur nga prokurori i çështjes Xhevahir Lita dhe shefi i tij në policinë Shkodër, oficeri me inicialet “L”.
Mësohet se dorëheqja e Elton Myrtaj, nuk është pritur mirë nga kolegët e tij në Shkodër. Ndërkohë mësohet se disa oficerë të tjerë në këtë Drejtori në ditët në vijim pritet të japin dorëheqjen, duke braktisur policinë.
Elton Myrtaj, u ngarkua si oficer për të hetuar sulmin me armë të ndodhur në muajin Shkurt 2021. Ai nisi punën me kçyrjen e pamjeve filmike dhe marjen në pyetje të Taulant Pepaj, Shkëlzen Xhenje, Eljo Hato, Kolec Markut, Arshli Bashlit dhe personave të tjerë protagonistë në këtë ngjarje.
Por puna hetimore e tij me qëllim identifikimin dhe arrestimin e autorëve të krimit që ishin anëtarë të grupit kriminal “Bajri” në Shkodër, u shit nga prokurori i çështjes Xhevahir Lita, i cili kundrejt 50 mijë euro pushoi çështjen për Ashli Bashlin dhe Eljo Haton, duke ndryshuar dhe akuzën për Shkëlzen Xhenjen nga “Vrasja me paramendim” mbetur në tentativë në “Mbajtje pa lejë të armëve”. Ndërkohë shefi i Elton Myrtaj, oficeri “L” sipas përgjimeve besohet se ka marë 5 mijë euro, për të zhdukur disa pamje filmike dhe disa përgjime në dosjen penale.
Në çështjen “Metamorfoza”, shihet si është zhvilluar në rastin e sulmit me armë ndaj Taulant Pepaj dhe Kolec Markut, ku prokurori i Shkodrës Xhevahir Lita, sinkronizohet me oficerin “L” të policisë së Shkodër, duke rënë dakord mbi linjën që do ndiqnin gjatë fazës së marrjes në pyetje të personave të dyshuar dhe vetë të dëmtuarit, Pepaj.
