Ambasadorët nga Rusia dhe Bjellorusia janë ftuar përsëri në banketin e çmimit Nobel pasi u përjashtuan vitin e kaluar për shkak të pushtimit të Ukrainës, tha Fondacioni Nobel, citon CNN.
Fondacioni tha se donte të përfshinte edhe ata që nuk ndajnë vlerat e çmimit Nobel.
“Është e qartë se bota ndahet gjithnjë e më shumë në sfera, ku dialogu mes atyre me pikëpamje të ndryshme po zvogëlohet”, tha Vidar Helgesen, drejtor ekzekutiv i Fondacionit Nobel.
“Për të kundërshtuar këtë tendencë, ne po zgjerojmë tani ftesat tona për të festuar dhe kuptuar çmimin Nobel dhe rëndësinë e shkencës së lirë, kulturës së lirë dhe shoqërive të lira paqësore”, tha Helgesen.
Rusët dhe bjellorusët janë përjashtuar nga ngjarje të panumërta që kur Moska nisi pushtimin e saj në shkallë të plotë të Ukrainës, në shkurt 2022. Atletëve nga Rusia dhe Bjellorusia u është ndaluar të konkurrojnë në ngjarje të shumta sportive dhe diplomatët përjashtohen rregullisht nga samitet.
