Këshilli i Sigurimit Kombëtar do të mblidhet ditën e sotme në orën 12:00 me urdhër të presidentit Bajram Begaj për të diskutuar mbi gjendjen e sigurisë kibernetike dhe masat e marra për forcimin e mbrojtjes kibernetike në Republikën e Shqipërisë.
“Thirrja e mbledhjes së Këshillit të Sigurimit Kombëtar synon të bëjë një analizë gjendjes aktuale të sigurisë kibernetike, sfidave dhe kërcënimeve me të cilat përballemi në këtë drejtim. Insititucionet përgjegjëse do të informojnë Këshillin e Sigurimit Kombëtar për masat e marra për forcimin e mbrojtjes kibernetike në zbatim të rekomandimeve të dhëna nga mbledhja e Këshillit të Sigurimit Kombëtar, në muajt Tetor 2022 dhe Janar 2023”-thuhet në njoftimin e bërë nga zyra e shtypit e presidencës.
Të pranishëm pritet të jenë, kryeparlamentarja, Lindita Nikolla, kryeministri Edi Rama, drejtori i Përgjithshëm i Policisë së Shtetit, Muhamet Rrumbullaku, drejtoresha e SHISH si dhe disa prej ministrave të kabinetit qeveritar. Për kryetaren e re të Shërbimit Informativ Shtetëror, Vlora Hysenin mbledhja e këshillit të Sigurimit Kombëtar do të jetë e para që pasi mori detyrën në 3 prill të këtij viti.
Sulmet e Iranit
Në verën e 2022 Shqipëria ra pre e sulmeve kibernetike nga Irani duke shkaktuar dhe ndërprerjen e marrëdhënieve diplomatike me këtë shtet në shtator të 2022. Sulmi i parë kibernetik ndodhi në mes të muajit korrik 2022 kur u sulmuan portalet shtetërore të shërbimeve online, të cilat nuk funksionuan për 4 ditë. Ndërsa më 10 shtator 2022, u sulmua sistemi TIMS. Sulmi ‘paralizoi’ për disa orë pikat e kalimit kufitar të të gjithë vendit, në Rinas, Kakavijë, e Kapshticë, ku policia hapi regjistrat duke punuar manualisht.
Me sytë nga siguria kibernetike
Pikërisht ky sulm e ngriti sigurinë kibernetike të Shqipërisë në një çështje kryesore, ku nga qeveria filluan të përqëndrohen shumë investime për të shmangur rreziqet, që vijnë nga kjo fushë. Në shkurt 2023 Shqipëria hartoi një plan strategjik për sigurinë e informacionit, ndërkohë SHBA ka dhënë 50 milionë dollarë dhe BE ka premtuar 15 milionë euro për të forcuar sigurinë kibernetike
Kjo është hera e dytë që presidenti Begaj mbledh Këshillin e Sigurimit Kombëtar për këtë vit. Mbledhja e parë u mbajt më 23 janar 2023 ku u kërkua rishikimi i dokumenteve strategjikë për çështjet e sigurisë.
Përkatësisht të pranishëm në mbledhje pritet të jenë:
1. Kryetari Kuvendit të Republikës së Shqipërisë, Sh.S. Zonja Lindita Nikolla
2. Kryeministri i Republikës së Shqipërisë, Sh.T. Zoti Edi Rama
3. Zv/Kryeministër dhe Ministër i Infrastrukturës dhe Energjisë, Zonja Belinda Balluku
4. Ministri i Mbrojtjes, Zoti Niko Peleshi
5. Ministri për Evropën dhe Punët e Jashtme, Zonja Olta Xhaçka
6. Ministri i Drejtësisë, Zoti Ulsi Manja
7. Ministri i Brendshëm, Zoti Blediar Çuçi
8. Minstri i Finacave dhe Ekonomisë, Zonja Delina Ibrahimi
9. Kryetari i Komisionit Parlamentar të Sigurisë, Zoti Nasip Naço
10. Shefi Shtabit të Përgjithshëm të FARSH, Gjeneral brigade Arben Kingji
11. Drejtori i Përgjithshëm i Policisë së Shtetit, Drejtues Madhor Muhamet Rrumbullaku
12. Drejtori i Shërbimit Informativ Shtetëror, Zonja Vlora Hyseni
Në këtë mbledhje janë ftuar të marrin pjesë edhe:
1. Zv/Kryetar i Komisionit Parlamentar të Sigurisë, Zoti Ferdinand Xhaferaj
2. Drejtori i Autoriteti Kombëtar për Çertifikimin Elektronik dhe Sigurisë Kibernetike, Zoti Igli Tafa
3. Drejtori i Agjencisë Kombëtare të Shoqërisë së Informacionit, Zonja Mirlinda Karçanaj
