Gjykata e Durrësit ka lënë në burg Habib Rexhën, i cili akuzohet për vrasjen e Arian Gosës në Kavajë. Ndërkohë shoku i tij, Ervis Kurti, i cili u akuzuar se ka ndihmuar 31-vjeçarin që të arratisej me makinë nga vendngjarja, është lënë në ‘arrest shtëpie’. Lajmi është konfirmuar për BalkanWeb nga gazetarja Klodjana Haxhiaj. Ngjarja ndodhi të dielën e 21 majit në një lokal në Kavajë, ku viktima pinte kafe me babain e tij të moshuar.
Rexha ka dëshmuar në polici se ditën e ngjarjes ka qenë rastësisht në të njëjtën zonë me Arian Gosën dhe se në makinë ka qenë me një shokun e tij, i cili nuk ka qenë në dijeni të situatës. Rexha ka deklaruar se i ka kërkuar mikut të tij të parkonte pak metra larg lokalit dhe ka shkuar e ka qëlluar me pistoletë Gosën me një plumb në kokë, duke i shkaktuar atij vdekjen e menjëhershme.
“Krimin e kreva pa e menduar, e pashë dhe e vrava”, ka thënë ai. Më pas Rexha rrëfen se i ka kërkuar mikut të tij që të largohen dhe miku i tij e ka lënë diku në dalje të Kavajës. Dyshohet se autori ka qëndruar në Kukës këto 2 ditë.
“Isha përballë kafenesë, në një kancelari, kur kam parë Arian Gosën në kafene me babain e tij. U largova 300-400 metra, parkova makinën dhe u nisa në drejtim të lokalit në këmbë. Nuk isha duke e ruajtur. E pashë rastësisht dhe veprova nga gjaknxehtësia. Në makinë isha me një shokun tim. Dhe po me shokun jam larguar në fillim drejt Durrësit e më pas në Kukës. Vendosa të vetëdorëzohesha me kërkesë të babait tim në bashkëpunim me policinë”, ka deklaruar ai.
