Feruzan Durdaj i cili humbi djalin e tij 6-vjeçar në tragjedinë e Gërdecit, ka rikujtuar sot pas 15 vitesh momentet e fundit të kaluara me të voglin e tij.
Në një intervistë për Euronews Albania ai ka kujtuar edhe momentin e parë kur mori vesh se djali i tij i vogël ishte plagosur nga shpërthimi në fabrikën e municioneve në Gërdec dhe përpjekjet e tij për ta shpëtuar.
“Më thanë se në Tiranë shkuan të gjithë të plagosurit. Kam vajtur në spitalin e ushtarakut për të kërkuar tim bir. Më vjen një telefonat e më thonë e ke te spitali i djegies. Shkova atje, djali nuk reagonte.
Djalin e kam çuar në Itali, llafet e fundit që i mbaj mend tim biri ishin, “babi më dhemb koka, më dhemb barku”, kaq mbaj mend, pastaj djali ndërroi jetë në 4 prill. Ishte një koincidencë e madhe kur ndërroi jetë djali.
E solla djalin nga Italia dhe pash që politika po gëzohej sepse kishim hyrë në NATO. Ishte një vuajtje shumë e madhe nga ana ime shpirtërisht. Kur fëmija nuk e dinte se ç’ishte baruti, politikanët qeshnin dhe gëzonin se ne po futeshim në NATO”.
