Një aksidenti rëndë me pasojë vdekjen ka ndodhur në Unazën e Madhe të Tiranës, ku një automjet është rrëzuar nga mbikalimi duke rënë nga disa metra lartësi.
Burime nga policia bëjnë me dije se kane humbur jetën dy vajza kurse 2 persona të tjerë janë të plagosur në gjendje të rëndë.
Sipas informacioneve nga policia, mjeti është rrëzuar nga mbikalimi dhe ka rënë poshtë në aksin e poshtëm mbi një tjetër automjet tip Hyunday.
Dy viktima dhe 2 të plagosurit udhëtonin të gjithë në automjetin e rrëzuar nga mbikalimi.
Automjeti po udhëtonte nga Unaza Lindore në drejtim të TEG-ut dhe ka rënë nga mbikalimi.
Në pamje duken edhe barrierat mbrojtëse të shkatërruara nga goditja e automjetit.
Në vendngjarje ka forca të shumta policie. Shkak i aksidentit paraprakisht dyshohet të ketë qenë shpejtësia e lartë.
Njoftimi i policisë:
Tiranë/Informacion paraprak
Më datë 09.03.2023, rreth orës 18:05, shtetasi Q. K., duke drejtuar automjetin, në unazën lindore dyshohet se duke dalë për tek rrethrrotullimi i Tegut, ka humbur kontrollin mbi drejtimin e tij dhe automjeti ka dalë nga rruga dhe ka rënë nga mbikalimi, mbi kofanon e një automjeti tjetër.Si pasojë kanë humbur jetën dy shtetase femra, si dhe janë dërguar në spital për ndihmë mjekësore shtetasit Q K., O. K., dhe K. R., të cilët ndodhen nën kujdesin e mjekëve.
Grupi hetimor ndodhet në vendngjarje dhe po punon për sqarimin e rrethanave të aksidentit.
Mbi rrethanat dhe shkaqet e aksidentit, pas përfundimit të këqyrjes së vendit të ngjarjes, dhe për gjendjen shëndetsore të të dëmtuarve në spital, do të keni njoftim në vijim.
