Më shumë se 100 njerëz, përfshirë fëmijë, kanë humbur jetën nga përmbytja e varkës në jug të Italisë.
Të paktën 63 emigrantë janë konfirmuar të vdekur, mes tyre 12 fëmijë përfshirë një foshnje.
Varka, ku raportohet se kishte rreth 200 njerëz, iu përplas me shkëmbinjtë ndërsa po përpiqej të ankorohej pranë Crotone të dielën.
Kryeministrja e Italisë Giorgia Meloni u ka kërkuar institucioneve të BE-së që të ndërmarrin veprime për të ndaluar udhëtimet klandestine me anije me emigrantë.
Në bordin e varkës, e cila ishte nisur nga Turqia disa ditë më parë, raportohet se kishte emigrantë nga Afganistani, Pakistani, Somalia, Siria, Iraku dhe Irani.
Roja bregdetare tha se 80 njerëz kanë mbijetuar, disa prej të cilëve mbërritën me not në bregdet. Ndërkohë dhjetëra të tjerë rezultojnë të zhdukur.
Një i mbijetuar u arrestua me akuzën e trafikimit të emigrantëve, tha policia doganore.
Një 16-vjeçar nga Afganistani humbi motrën e tij 28-vjeçare, e cila ka ndërruar jetë në plazh pranë tij.
Gjithashtu një 43-vjeçar nga Afganistani mbijetoi së bashku me djalin e tij 14-vjeçar, por gruaja dhe tre fëmijët e tjerë, të moshës 13, 9 dhe 5 vjeç, nuk ia dolën dot. Një tjetër grua afgane e përlotur nuk lëvizte nga plazhi pasi humbi burrin e saj.
“Kjo është një tjetër tragjedi që po ndodh pranë brigjeve tona. Ajo na kujton të gjithëve se Mesdheu është një varr masiv gjigant,” tha Francesco Creazzo, nga organizata jo-qeveritare SOS Méditerranée.
