Zyrtarët amerikanë po ushtrojnë presion ndaj Turqisë, duke u kërkuar autoriteteve turke që të ndalojnë linjat ajrore ruse me avionë të prodhuar nga SHBA të fluturojnë drejt dhe nga Turqia, raporton Wall Street Journal duke cituar burime amerikane.
Zyrtarët e lartë amerikanë kanë paralajmëruar që nga muaji i kaluar turqit se aeroplanët e prodhimit amerikan që fluturojnë drejt dhe nga Rusia dhe Bjellorusia në kundërshtim me sanksionet, do të përballen me dënime me burg, gjoba, pezullim të privilegjeve etj.
Ky paralajmërim për Turqinë është një provë kyçe nëse SHBA dhe aleatët e saj mund të zbatojnë realisht izolimin afatgjatë të Rusisë, siç vëren WSJ në artikullin e saj.
Çdo dështim do të thotë se Moska do të vazhdojë të gjejë mënyra për të përjetësuar aktivitetet e saj ekonomike ndërkombëtarisht me ndihmën e vendeve të treta.
Një zëdhënës i Departamentit të Tregtisë së SHBA-së pranoi se janë lëshuar paralajmërime për linjat ajrore të huaja se Uashingtoni po kërkon të respektojë sanksionet e vendosura kundër avionëve komercialë rusë, bjellorusë dhe iranianë.
Si pjesë e sanksioneve kundër Moskës për luftën në Ukrainë, administrata Biden ka vendosur kontrolle që ndalojnë Rusinë dhe linjat ajrore komerciale ruse të përdorin avionë të prodhuar nga Amerika.
Sipas këtyre kufizimeve, çdo avion i ndërtuar në SHBA ose që mban një përqindje të konsiderueshme (mbi 25%) të komponentëve amerikanë, nuk lejohet më të fluturojë në Rusi dhe Bjellorusi, nëse nuk kanë marrë leje nga ministria e Tregtisë së SHBA.
Sipas të dhënave nga kompania e analizës së të dhënave të fluturimeve Cirium, linjat ajrore ruse dhe bjelloruse kanë kryer më shumë se 2100 fluturime me avionë të prodhimit amerikan (Boeing 777, 757 dhe 737) në Turqi (Stamboll, Izmir, Antalia, etj.) nga tetori 2022 e në vazhdim.
Qeveria amerikane, në përpjekjen e saj për të forcuar praktikisht sanksionet që ka vendosur ndaj Rusisë një vit pas fillimit të luftës, tani po u bën thirrje vendeve që vazhdojnë të kenë lidhje ekonomike me Moskën, vende si Turqia dhe Emiratet e Bashkuara Arabe për të bërë më shumë për të respektuar sanksionet.
