Është arrestuar një nga autorët e vrasjes së 49-vjeçarit Edmond Papa, ndaj të cilit u bë një atentat në një lokal në rrugën “Fadil Bodinaku” në Tiranë.
Bëhet fjalë për 30 vjeçarin Albano Velo, lindur në Këlcyrë Përmet dhe banues në Tiranë, gjithashtu është shpallur në kërkim edhe bashkautori shtetasi A. B., 44 vjeç, banues në Tiranë.
Policia e Tiranës ka dhënë detaje lidhur me vrasjen e ndodhur në 16 dhjetor të vitit 2022, ndërsa bën me dije se janë automjeti i përdorur gjatë kryerjes së vrasjes, pamje filmike e prova të tjera të vlefshme, që çuan në identifikimin e autorëve.
Kujtojmë se Edmond Papa u qëllua me armë zjarri në një lokal në Tiranë dhe si pasojë e plagëve nuk arriti të mbijetojë dhe humbu jetën rrugës për tek Trauma. Viktima ishte vëzhguar nga autorët dhe dhe në momentin kur është ulur në lokal u qëllua me 9 plumba.
Ndërsa u raportua se shkak i vrasjes dyshohej të ishte larja e hepaseve për prishjen e pazareve te drogës në Greqi.
NJOFTIMI I POLICISË:
Zbardhet ngjarja e ndodhur më 16 dhjetor 2022, ku mbeti i varë me armë zjarri shtetasi Edmond Papa
Finalizohet operacioni policor i koduar “EAGLE EYES”
Identifikohet dhe ndalohet njëri prej autorëve të vrasjes
Shpallet në kërkim bashkëautori i vrasjes.
Sekuestrohet automjeti i përdorur gjatë kryerjes së vrasjes, pamje filmike e prova të tjera të vlefshme, që çuan në identifikimin e autorëve.
Nga strukturat e Sektorit të Hetimeve të Krimeve të Renda ndaj Jetës e Pronës në DVP Tiranë nën drejtimin e Prokurorisë së Rrethit Gjyqësor Tiranë, më datë 01.01.2023, në orët e para të mëngjesit, u finalizua operacioni policor i koduar “EAGLE EYES”, si rezultat i të cilit u bë i mundur dokumentimi i plotë ligjor i ngjarjes së datës 16.12.2022, ku në rrugën “Fadil Bodinaku“ Tiranë, është vrarë me armë zjarri shtetasi Edmond Papa, i datëlindjes 1973, lindur në fshatin Kurjan Fier dhe banues në Sarandë.
Policia e Tiranës pas një pune profesionale e të pandërprerë trejavore, duke shfrytëzuar të dhënat e inteligjencës policore, përdorimit të metodave speciale të hetimit, administrimit dhe vlerësimit në kohë të provave ligjore, ka bërë të mundur dokumetimin ligjor të autorësisë së kësaj ngjarje kriminale.
Në kuadër të operacionit policor të koduar “EAGLE EYES” u bë ndalimi i shtetasit:
A. V. 30 vjeç, lindur në Këlcyrë Permet dhe banues në Tiranë, i dyshuar për veprën penale “Vrasja me paramendim” .
Si dhe shpallja në kërkim e bashkëautorit, shtetasi A. B., 44 vjeç, banues në Tiranë.
Nga hetimi rezultoi se autorët e kanë ndjekur për disa ditë shtetasin Edmond Papa, para dhe ditën e ngjarjes deri në realizimin e krimit.
Në cilesinë e provave materiale është gjetur dhe sekuestruar automjeti tip “Audi” i përdorur nga autorët e dyshuar para dhe pas ngjarjes, pamje filmike dhe 3 aparate celular.
Nga strukturat hetimore për Krimet e Rënda në DVP Tiranë, nën drejtimin e Prokurorisë së Rrethit Gjyqësor Tiranë, vijon puna për dokumentimin e plotë ligjor të kësaj ngjarjeje.
Materialet procedurale, i kanë kaluar Prokurorisë se Rrethit Gjyqësor Tiranë, për veprime të mëtejshme.
