Ndër frutat e thata, bajamet janë më të njohura në botë. Ato janë shumë të ushqyeshme, të pasura me yndyrna të shëndetshme, antioksidantë, vitamina dhe minerale.
Janë të shijshme për t’u ngrënë, por janë të mira edhe për përmirësimin e shëndetit, kur bëhet fjalë për përbërjen e mikrobeve të zorrëve. Ky është rezultati i ‘King’s College’.
Për përmirësimin e shëndetit të zorrëve, ekspertët e dietave shpesh sugjerojnë të provoni ushqime probiotike, si kosi. Megjithatë, mund të ketë një ushqim tjetër për t’i shtuar kësaj liste dhe janë bajamet.
Studiuesit nga ‘King’s College’ në Londër kanë hetuar ndikimin e bajameve të plota dhe të bluara në përbërjen e mikrobeve të zorrëve. Ata zbuluan se ngrënia e një grushti bajame çdo ditë rrit ndjeshëm prodhimin e butiratit, një acid yndyror që promovon shëndetin e zorrëve.
“Një pjesë e mënyrës në të cilën mikrobiota e zorrëve ndikon në shëndetin e njeriut është për mes prodhimit të acideve yndyrore, siç është butirati”,- tha autori kryesor, profesor Kevin Whelan.
“Këto molekula veprojnë si një burim karburanti për qelizat në zorrën e trashë. Ato rregullojnë thithjen e lëndëve të tjera ushqyese në zorrë dhe ndihmojnë në balancimin e sistemit imunitar”.
Për studimin, ekipi rekrutoi 87 të rritur të shëndetshëm, të cilët tashmë po hanin më pak se sasia e rekomanduar e fibrave dietike dhe që konsumonin ushqime tipike jo të shëndetshme. Për katër javë, pjesa e pare e grupit i ndryshuan ushqimet e tyre në 56 gram bajame të plota në ditë, pjesa e dytë e grupit në 56 gram bajame të bluara në ditë dhe e treta në ‘muffins’.
Studiuesit zbuluan se butirati ishte dukshëm më i lartë tek ata që hanë bajame, në krahasim me ata që konsumuan muffins.
“Testimi tregoi se ngrënia e bajameve të plota dhe të bluara përmirësoi dietën e njerëzve, duke pasur konsum më të lartë të acideve yndyrore të ngopura, fibrave, kaliumit dhe lëndëve të tjera ushqyese të rëndësishme në krahasim me grupin e kontrollit”,- shtuan autorët.
Rezultatet e plota të studimit janë publikuar në ‘American Journal of Clinical Nutrition’.
