Mbrëmjen e djeshme (8 tetor) u shoqërua në ambientet e policisë, Indrit Dokle, një eksponent i botës së krimit në Shqipëri. Pak kohë më parë, ai u morë në pyetje për zhdukjen e mistershme të Ervis Martinajt, pasi familjarët e këtij të fundit ngritën akuza se prapa zhdukjes së djalit të tyre qëndron pikërisht Dokle.
Në dosjen hetimore të SPAK, në lidhje me krimet ku është përfshirë Nuredin Dumani, i cili ka dëshmuar para prokurorëve të Prokurorisë së Posaçme, rezulton se Ervis Martinaj ka porositur vrasjen e Indrit Dokles.
Në dëshminë e tij, Dumani, ka deklaruar se nuk donte të vriste Doklen. Gjithashtu ka treguar se i ka marrë paratë Ervis Martinajt, një shumë prej 100 mijë euro por nuk ka pranuar që të eliminojë Doklen.
Në dosjen e plotë hetimore e cila është publikuar pak muaj më parë bëhet me dije se ndër të tjera, Martinaj ka qenë i interesuar posaçërisht për vrasjen e Endrit Dokles, ish-anëtarit të bandës së Durrësit, më vonë rival i përbetuar i Lulzim Berishës. Dokle la qelinë në vitin 2020.
