Gjykata e Apelit nuk ka pranuar ankimimin e bërë nga ish agjenti i skuadrës së kërkimit “Fast” Jeton Lami, për lirim nga burgu. Këtë të martë, Apeli i Tiranës ka lënë në fuqi masën “arrest me burg” ndaj Lamit, i cili dyshohet se është personi që lëvizte dhe ndihmonte për t’u fshehur të shumërkërkuarin Ervis Martinaj.
Polici që ndihmonte Ervis Martinajn të fshihej kërkon lirinë, Apeli e rrëzon. Jeton Lami nuk paraqitet në gjyq
Mësohet se Lami nuk ka qenë i pranishëm në seancën e mbajtur sot në Apel, por është përfaqësuar nga dy avokatët e tij mbrojtës.
NJOFTIM PER MEDIAN
Referuar interesimit të mediave, Gjykata e Apelit Tiranë, informon sa më poshtë:
Gjykata e Rrethit Gjyqësor Kurbin, ka zhvilluar gjykimin lidhur me caktimin e masës së sigurimit personal “Arrest ne burg” ndaj personit nën hetim shtetasit me iniciale J.L, i dyshuar për kryerjen e veprës penale “Shpërdorim i detyrës”, parashikuar nga neni 248 i K.Penal.
Me vendimin nr. 893-81, datë 23.08.2022 Gjykata e Rrethit Gjyqësor Kurbin vendosi:
– Pranimin e kërkesës.
– Të caktohet ndaj personit nën hetim shtetasit J.L, masa e sigurimit personal “Arrest në burg”, në mungesë, parashikuar nga neni 283 të K.Pr.Penale, i dyshuar për kryerjen e veprës penale “Shpërdorim i detyrës”, parashikuar nga neni 248 i K.Penal.
Në vijim, Gjykata e Rrethit Gjyqësor Kurbin, ka zhvilluar gjykimin lidhur me verifikimin e kushteve të zbatimit të masës së sigurimit, të personit nën hetim shtetasit me iniciale J.L, i dyshuar për kryerjen e veprës penale “Shpërdorim i detyrës”, parashikuar nga neni 248 i K.Penal.
Me vendimin nr. 894-82, datë 25.08.2022 Gjykata e Rrethit Gjyqësor Kurbin vendosi:
– Pranimin e kërkesës.
– Vazhdimin e zbatimit të masës së sigurimit personal “arrest në burg”, për shtetasin J.L, të parashikuar nga nenet 232/dh e 238 të Kodit të Procedurës Penale, të vendosur me vendimin nr. 893 datë 23.08.2022, të Gjykatës së Rrethit Gjyqësor Kurbin.
Çështja në apel u shqyrtua mbi bazën e ankimit të bërë nga personi nën hetim me iniciale J.L, i cili kërkoi një masë sigurimi më të lehtë se ajo e dhënë nga Gjykata e Rrethit Gjyqësor Kurbin.
Ankuesi nuk u paraqit në gjykimin në Apel, i cili u zhvillua në prezencë të dy mbrojtësve të tij.
Në vijim, Gjykata e Apelit Tiranë, e përbërë nga Relatore Gjyqtare znj.Edlira Petri, me vendimin nr, 801 datë 20.09.2022 vendosi:
– Miratimin e vendimit nr. 894-82, datë 25.08.2022 Gjykata e Rrethit Gjyqësor Kurbin.
Tiranë, 20.09.2022
Gjykata e Apelit Tiranë
