Kryeministrja suedeze, Magdalena Andersson, ka bërë me dije ditën e sotme se Suedia do të ofrojë një paketë të re ndihme ushtarake për Ukrainën, me qëllim që ajo të mund të vetëmbrohet dhe të përballojë sulmet e Rusisë.
Paketa e re e ndihmës do të jetë në vlerë prej 500 milionë krunash apo 46.75 milionë dollarësh.
Andersson, teksa u takua me ministrin e Jashtëm ukrainas, Dmytro Kuleba, tha për gazetarët se Qeveria e saj do të ofrojë edhe një paketë të ndihmës prej 1 miliard krunash apo 940 mijë euro. Kjo do të jetë ndihmë ushtarake dhe civile për Ukrainën.
Kuleba tha se Suedia do t’i ofrojë shtetit të tij armë sikurse obusë dhe granata.
“Për aq kohë sa lufta vazhdon, ne do të kërkojmë më shumë armë”, tha Kuleba.
“Çdo euro, çdo plumb, çdo granatë është e rëndësishme”, shtoi ai.
Kryeministrja suedeze nuk dha detaje për paketën ushtarake, por tha se do të jetë e ngjashme me ndihmën e mëparshme, që ka përfshirë armë kundërtanke, pajisje për mbrojtjen e ushtarëve dhe pajisje për pastrimin e minave.
“Ne do të vazhdojmë të mbështesim Ukrainën për aq kohë sa lufta vazhdon”, tha Andersson.
Në pjesën e ndihmës civile përfshihet edhe blerja e grurit ukrainas, që më pas do t’iu dërgohet shteteve që po përballen me mungesë të ushqimeve. Kjo, sipas Suedisë, bëhet për të mbështetur ekonominë ukrainase.
Që prej kohës kur Rusia nisi pushtimin e Ukrainës më 24 shkurt, shtetet perëndimore kanë ofruar ndihmë të vazhdueshme ushtarake dhe civile për Kievin.
