Ditën e sotme do të vijojnë takimet mes të dërguarit Miroslav Lajçak dhe Gabriel Escobar dhe zyrtarëve në Prishtinë.
Mësohet se në orën 16:00 në Zyrën e BE-së në Prishtinë, Lajçak do të jetë mikpritësi i takimit me opozitën. Gazeta Express bën me dije se bashkë me Lajçak do të jetë edhe një përfaqësues i Zyrës së BE-së, ndërkohë që të ftuar do të jenë edhe pala amerikane, i dërguari Gabriel Escobar dhe Ambasadori Jeff Hovenier.
Nga opozita, në takim do të marrin pjesë PDK, LDK e AAK, respektivisht Memli Krasniqi dhe një zyrtar i PDK-së, Lumir Abdixhiku me një zyrtar nga LDK dhe Ramush Haradinaj, i shoqëruar nga një zyrtar i AAK-së.
Liderët opozitarë kanë pasur mbrëmjen e djeshme një takim të ngjashëm në ambasadën amerikane, ku kanë qenë të ftuar për darkë me të dërguarin e SHBA-së për dialogun, Gabriel Escobar.
Lajçak dhe Escobar po qëndrojnë në rajon në përpjekje për të arritur një marrëveshje për targat dhe dokumentet e udhëtimit.
