Deputeti i Partisë Demokratike, Ervin Salianji ka reaguar për çmimet e karburanteve në vendin tonë të vendosura nga Bordi i Transparencës.
Salianji thotë se çmimi i naftës në bursë ka pësuar rënie pikiatë këtë javë, ndërsa në Shqipëri, nafta vijon në çmime stratosferike.
Në një reagim në rrjetin social Facebook, Salianji thotë se faji në këto momente është i marrëveshjeve kartel mes anëtarëve të bordit të transparencës dhe qeverisë.
Postimi i Ervin Salianjit:
Çmimi i naftës në bursë ka pasur rënie pikiatë këtë javë, në Shqipëri nafta vazhdon në çmime stratosferike duke mos reflektuar rënien e çmimit në bursat ndërkombëtare. Kur ka rritje reflektohet menjëherë si me buton! Më përpara faji vendosej sa qeverisë, sa oligarkëve, ndërsa prej muajsh me krijimin e bordit të përbashkët faji është i marrëveshjeve kartel dhe bashkëpunimit të tyre me qeverinë!
Ky çmim nafte që ka sot Shqipëria po ta krahasosh me vendet e Evropës për fuqinë blerëse dhe pagat mesatare është njësoj sikur në Evropë të përballohej një çmim prej 15 eurosh për litër, ndërkohë që vetëm pak vende e kanë më shtrenjtë se ne!
