Suella Braverman ka mbështetur Sekretaren e Jashtme Liz Truss për të qenë udhëheqësja e ardhshme e Partisë Konservatore në Britaninë e Madhe, pasi u eliminua nga gara për të qenë kryeministre e ardhshme.
Ish-kancelari Rishi Sunak doli i pari në raundin e fundit të votimit, me Penny Mordaunt të dytën dhe Truss të tretën.
Ish-ministri i Brexit Lord Frost ndërkohë i ka kërkuar kandidates së vendit të katërt, Kemi Badenoch, të japë dorëheqjen.
Tom Tugendhat është kandidati i pestë në garë, ku deputetët konservatorë do të zvogëlojnë konkurrentët në dy të fundit përmes një serie votash, përpara se një votim i anëtarëve të Partisë Konservatore të vendosë fituesin.
Lordi Frost i dha sekretares së jashtme miratimin e tij përpara debatit të parë mes kandidatëve.
Dhe duke shkruar në Daily Telegraph, ai sugjeroi që ish-ministrja e barazive zonja Badenoch të tërhiqej nga gara “në këmbim të një pune serioze në një administratë Truss”.
“Ne kemi nevojë për unitet midis tregtarëve të lirë. Kemi dhe Suella Braverman përcaktuan programe bindëse, me thekse të ndryshme, për ndryshim,” tha Lord Frost.
“Por thellësia e përvojës së Liz-ës, energjia dhe idetë e saj – si dhe fakti i thjeshtë që ajo ka më shumë vota nga të treja – e vendosin atë në krye.”
Megjithatë, Badenoch tha se ajo “nuk ka ndërmend të tërhiqet nga gara dhe është në të për të fituar”.
Një zëdhënës i deputetes tha se ajo kishte sjellë “ide interesante dhe një qasje të re në konkurs”.
Pesë kandidatët do të marrin pjesë në disa debate, të premten në Channel 4, të dielën në ITV dhe të martën në Sky.
Ish-ministri i Brexit Steve Baker ka mbështetur gjithashtu sekretaren Truss. Shumica e 27 deputetëve konservatorë që votuan për zonjën Braverman në raundin e dytë pritet ta bëjnë të njëjtën gjë.
Prokurorja e Përgjithshme, zonja Braverman e kishte quajtur veten si e vetmja kandidate “autentike” e Brexiteer-it, duke vënë në dukje dorëheqjen e saj si ministre e Brexit nën drejtimin e qeverisë nga Theresa May.
Ajo i tha BBC-së se zonja Truss ishte kandidatja më e mirë për të përmbushur “premtimet për Brexit” dhe do të mbante një “vijë të fortë” për migrimin e paligjshëm, lirinë e fjalës dhe uljen e taksave.
Sunak është ende në pole position pasi fitoi 101 vota në votimin e së enjtes, i ndjekur nga ministrja e tregtisë zonja Mordaunt, e cila fitoi 83 vota.
Ndërkohë që Truss siguroi 64 vota.
Badenoch doli e katërta me 49 vota, ndërkohë kryetari i komitetit të punëve të jashtme Tom Tugendhat – i pesti me 32 vota, i cili deklaroi gjithashtu se ishte i vendosur të vijonte garën.
Raundi tjetër i votimit, kur eliminohet kandidati me më pak vota, zhvillohet të hënën.
Rezultati përfundimtar do të shpallet më 5 shtator, kur Boris Johnson do të largohet nga detyra.
Mbështetja e Suella Braverman do të jetë një lajm i mirëpritur për Liz Truss.
Por sigurisht, kjo nuk garanton që të gjithë 27 mbështetësit e saj do të ndjekin shembullin e saj.
