Presidenti rus Vladimir Putin u kundërpërgjigj liderëve perëndimorë që talleshin me bëmat e tij atletike, duke thënë se do të dukeshin “të neveritshme” nëse do të përpiqeshin të imitonin paraqitjet e tij të zhveshura.
Putin e bëri këtë koment gjatë një vizite në Turkmenistan të enjten herët kur u pyet për liderët perëndimorë që bënin shaka me të në samitin e G7.
Ndërsa ata u ulën për bisedime, kryeministri britanik Boris Johnson bëri shaka se udhëheqësit e G7 mund të heqin rrobat e tyre për të “treguar se ne jemi më të ashpër se Putini” në mes të tensioneve Rusi-Perëndim lidhur me aksionin ushtarak të Moskës në Ukrainë.
Kryeministri kanadez Justin Trudeau tha me shaka se liderët perëndimorë mund të përpiqeshin të përputnin fotot e bustit të zhveshur të Putinit me një “shfaqje kalërimi me gjoks të zhveshur”, një nga aventurat e tij sportive të publikuara gjerësisht.
Duke folur me gazetarët, Putin u përgjigj se, ndryshe nga ai, liderët perëndimorë abuzojnë me alkoolin dhe nuk merren me sport.
“Nuk e di se si kanë dashur të zhvishen, sipër apo poshtë belit,” tha ai. “”Por unë mendoj se do të ishte një pamje e neveritshme në çdo rast.”
