Ministrja e Kulturës, Elva Margariti në interpelancën e sotme në Kuvend të thirrur nga deputetja Ina Zhupa, për çështjen e Butrintit, tha se në Butrint nuk do të ketë asnjë hotel apo kullë.
Gjithashtu u shpreh se rreth 1.5 km larg Butrintit parashikohet ngritja e një qendre pritjeje dinjitoze për vizitorët.
“Është për ndezur llampushke për një diskutim shterpë. Butrinti do të administrohet nga një fondacion shqiptar. Shteti shqiptar është i hapur për të tjerë donator të fuqishëm. Fondacioni funksionon sipas ligjit të OJF shqiptar. Çdo qindarke e Butrintit do të mbetet në Butrint. Të gjithë ata që shohin ëndrra me kulla e hoteli i them që nuk do të ketë asnjë ndërtim të këtij lloji, do të parashikohet ngritja e një qendre dinjitoze larg rreth 1.5 km që të kemi një hyrje dinjitoze në një park kombëtar si në shumë vende të botës. Do të sigurohet transport ekologjik. Çdo investim në Butrint i mbetet Butrintit, parashikojmë të kemi rreth 110 punonjës dhe shteti nuk do të shpenzojë më para për pagat e punonjësve. Arka e Butrinti do të fillojë të kontribuojë ne kujdesin e Trashëgimisë Kulturore për t’i ardhur në ndihmë edhe siteve të tjerë. I rëndësishëm, është nënshkrimi mes fondacionit dhe Institutit të Arkeologjisë”, tha Margariti.
Ndërkohë qëndrimi i deputetes Ina Zhupa ka qenë kritik, ndërsa u shpreh se mazhoranca nuk ka guximin të flasë dhe t’i tregojë qytetarëve për këtë koncesion.
“Për këtë koncesion që realisht nuk keni guximin ti thoni emrin e vërtetë sepse e kuptoni që në asnjë vend në botë, nuk ndodh që një shtet të nxjerrë pasurinë kulturore në koncesion dhe të ja dorëzojë privati. Nuk ekziston sepse ky ligj është antikushtetues dhe besoj do të kthehet nga Presidenti. Ky ligj bie në kundërshtim me konventën”, tha Zhupa.
