Ish-Presidenti Bujar Nishani u përcoll këtë të enjte të 2 qershorit për në banesën e fundit, me të gjitha nderimet siç parashikon ligji, përmes një ceremonie shtetërore,
I pranishëm për të zhvilluar homazhe ishte dhe ish-presidenti i Republikës Alfred Moisiu, i cili në fjalën e tij për media kujtoi njohjen e hershme me Bujar Nishanin.
Moisiu tha se njohja e tyre daton që në vitin 1994, kur Nishani ishte ende një oficer i ri dhe se marrëdhëniet miqësore kanë vijuar ndër vite.
Ai shton se në momentin që u zgjodh në krye të shtetit e ftoi Nishanin të ishte pjesë e stafit të tij në Presidencë, por ky i fundit refuzoi pasi zgjodhi karrierën politike.
“E kam njohur që në vitin 1994 ishte oficer i ri akoma dhe që atëherë kam pasur relata të vazhdueshme me të. Edhe kur mora detyrën e kryetarit të shtetit e ftova për të qenë pjesë e stafit, por nuk pranoi, vazhdoi në rrugën e Partisë Demokratike.
Edhe më vonë gjithmonë kam ruajtur kontaktet dhe kur ka qenë Ministër i Brendshëm dhe i Drejtësisë dhe kur ka qenë president.
Ka qenë një president i mirë, ka luftuar për të zbatuar Kushtetutën. Më vjen keq për këtë ndarje të parakohshme që ka kontribuar për vendin tone”, tha Moisiu.
