Familjarët e 34-vjeçarit Maksim Debrova i cili ndërroi jetë gjatë punës në ndërtim kanë publikuar video që i ndjeri i dërgonte nga kantieri i ndërtimit duke hedhur poshtë pretendimet e kompanisë private “Eral Construction” e cila tha se viktima nuk kishte asnjë lidhje me ta.
Në videot e siguruara nga Panorama.al të cilat motra e viktimës shprehet se ia ka dërguar vëllai i saj, duket ky i fundit teksa filmon veten duke punuar në kantier ndërtimi.
Motra e 34-vjeçarit u shpreh se ai i dërgonte shpesh video që kur filloi punë. Ajo bashkë me të shoqen e tij thonë se kompania e merrte dhe çonte me makinë nga puna në shtëpi dhe anasjelltas.
“Vëllai im kur punonte më sillte video. Çdo punë që bënte aty brenda. Merrte video dhe m’i sillte mua. Pyetëm një qytetare atje më tha sillni dhe gazetaren të flasë nuk e kam problem. Më tha nuk e prisja të vije këtu. I thashë desha ta di a ka ngrënë gjë vëllai a ka ngrënë gjë mos të ikë me barkun bosh.
Më tha mos e ki merak kur të dojë ujë të trokasë në derë. Tha para pesë minutash kishte pirë ujë kur e pashë tha pas pesë minutash kishte rënë në tokë dhe ishte bërë gjak. Mora një peshqir dhe ia vura. Nuk na tregojnë të vërtetën. Thonë që nuk ka qenë në punë por vëllai ka qenë në punë. I kam videot në telefon”, thotë motra e 34-vjeçarit.
