Në Kherson, ushtria ukrainase thotë se ka nisur një kundërofensivë në një përpjekje për të rimarrë këtë zonë që është pushtuar nga Rusia, duke paralajmëruar një fazë të re të luftimeve.
“Kherson duroni, jemi afër!”. Ky ishte mesazhi i Shtabit të Përgjithshëm të Forcave të Armatosura të Ukrainës, që shkroi të dielën në Twitter. Qyteti port në Ukrainën jugore ishte zona e parë e madhe që ra pas pushtimit të forcave ruse në shkurt. Rusia po përpiqet të ndërtojë mure mbrojtëse në qytet, por nuk ishte menjëherë e qartë nëse trupat ishin përgatitur për kundërsulmin ukrainas, raporton BBC.
Shtabi ushtarak i Ukrainës pretendoi në një deklaratë se forcat e saj kishin depërtuar një linjë ruse të mbrojtjes dhe i shtynë forcat e saj në një terren më pak të favorshëm. Trupat e saj shpresonin gjithashtu të kërcënonin rrugët e furnizimit të Rusisë në urat mbi lumin Dnipro.
