Vadim Shishimarin, 21 vjeç, u dënua ditën e djeshme me burgim të përjetshëm pasi pranoi se kishte vrarë një civil ukrainas të paarmatosur, gjatë ditëve të para të luftës.
Rusi i arrestuar pranoi se kishte vrarë Oleksandr Shelypov, 62 vjeç, duke e qëlluar katër herë në kokën në seancë ne parë gjyqësore për krimet e luftës në Ukrainë. Rreshteri, nga Irkutsk, tregoi se e kishte qëlluar Shelypov me urdhër të një oficeri epror.
Gruaja e viktimës, 61 vjeç, kishte udhëtuar pesë orë me makinë për në Kiev nga shtëpia e saj në Ukrainën rurale, vetëm 50 milje nga kufiri rus, për t’u përballur dje në gjykatë me vrasësin e burrit të saj. Në sallë, ajo tregoi se Oleksandr po shkonte me biçikletën e tij për në shtëpi kur u qëllua me armë zjarri, me gjakftohtësi në fshatin verilindor Chupakhivka më 28 shkurt, ditën e pestë të luftës.
Ajo shtoi se burri i saj prej 39 vitesh kishte qenë një ‘pensionist paqësor’ që nuk kishte paraqitur asnjë kërcënim për ushtarët rusë.
(Vadim Shishimarin, 21 vjeç)
Për ironi të fatit, Shelypov kishte shërbyer në ushtrinë ruse si truprojë e KGB-së për ish-udhëheqësin sovjetik Leonid Brezhnev. Ai u vra 40 vjet më vonë në pushtimin e urdhëruar nga presidenti Vladimir Putin, vetë një ish-oficer i zbulimit të KGB-së.
“Kam ardhur ta shoh personalisht vrasësin e tim shoqi. Ai dukej si një fëmijë, por megjithatë ai do të marrë dënimin e tij”- tha ajo.
Ajo e quajti vdekjen e bashkëshortit të saj ‘të pakuptimtë’, duke shtuar: “Ai thjesht po kalonte rrugën, nuk paraqiste asnjë kërcënim për askënd”.
Duke folur për Shishimarin, ajo tha: “Unë e di që ai është një ushtarak dhe ai po ndjek urdhrat, por pse nuk qëlloi në tokë ose në ajër? Ai duhet të kalbet në burg dhe të kalojë pjesën tjetër të ditëve të tij duke menduar për atë që ka bërë.”
