Një aksident i rëndë ka ndodhur në orët e para të ditës së sotme në Eugendorf të Austrisë, ku të paktën 19 persona janë plagosur.
Sipas mediave austriake, aksidenti ka ndodhur rreth orës 3:00 në drejtim të Vjenës, ndërsa një autobus që ishte nisur nga Kosova për në Hanover të Gjermanisë, është përplasur me trafik-ndarësen. Në autobus ishin 28 pasagjerë, ndërsa 3 persona janë në gjendje të rëndë.
“U njoftuam se në orën 03:08 është përplasur autobusi me 28 persona pasagjerë. Në aksident mbetën të plagosur rëndë tre persona dhe 16 të plagosur lehtë. Tre të plagosurit rëndë, tre janë dërguar në spitalet e Salzburgut”, ka thënë për mediat rajonale të Salzburgut, Hermann Gerstgraser, komandanti i autoritetit të shpëtimit të qarkut të Flachgau.
