Kryeministri Edi Rama e bëri të qartë se nuk do të heshtë derisa të jetë drejtësia ajo që duhet të flasë dhe të thotë nëse për një zyrtar të lartë ka çështje penale apo jo.
Sipas kreut të qeverisë, nuk mundet më që çështje që janë mbajtur mbyllur në kapakun e drejtësisë së vjetër të vazhdojnë të tilla edhe nën hundën e drejtësisë së re.
Kryeministri Rama: Ne nuk mund të heshtim dhe drejtësia duhet ta thotë, nëse këtu ka çështje penale, sepse çështjet morale janë të zgjidhura. Çështje që e kanë tromaksur këtë popull dhe që janë mbajtur mbyllur me kapakun e drejtësisë së vjetër nuk mund të mbahen mbyllur nën hundën e drejtësisë së re.
Ndërkohë që vettingu, për pak ditë bëhet 5 vjet dhe kanë bërë një punë voluminoze, ku janë gjykatësit dhe prokurorët e korruptuarit që kanë dalë para drejtësisë. Do më thoni që nuk ka pasur kohë?! Do më thoni që janë çështje të hetuara me shumë detaje dhe nuk ka pasur kohë për të marrë të pandehur gjykatës dhe prokurorë të cilët një institucion i pavarur sic është Komisioni i Vettingut ka nxjerrë qartësisht fakte korruptive?! Po si ka mundësi?! Kjo është e pamundur, e pajustifikueshme dhe të pa tolerueshme. Kjo nuk është ndërhyrje.
Kryeministri Rama u shpreh se nuk do ti ndahen prokurorëve dhe gjykatësve të korruptuar, të cilët sic tha ai janë shkarkuar nga organet të pavarur.
