Qeveria miratoi në mbledhjen e sotme emërimin e Erzen Shkolollit në postin e drejtorit të Galerisë Kombëtare të Arteve. Shkololli zëvendëson në këtë detyrë Artan Shabanin, i cili për 4 vjet drejtoi GKA. Shabani është emëruar në vitin 2013 në krye të galerisë së arteve, si zgjedhje e vetë kryeministrit Edi Rama.
Ministria e Kulturës pak kohë më parë shpalli konkursin për pozicionin e drejtorit në këtë institucion. Madje në vendimin e Ministrisë së Kulturës të shpallur në faqen zyrtare, konkretisht shkruhet: “në zbatim të Vendimit të Këshillit të Ministrave nr. 173, datë 07.03.2003 “Për emërimin, lirimin ose shkarkimin nga detyra të drejtuesve të institucioneve, në varësi të Këshillit të Ministrave, Kryeministrit ose Ministrit”, Ministria e Kulturës shpall konkursin për pozicionin: Drejtor, në Galerinë Kombëtare të Arteve .
Nuk dihet nëse qeveria e morri vendimin bazuar në ndonjë konkurs, qoftë edhe formal, të organizuar nga Ministria e Kulturës, apo u ndoq e njëjta praktikë si 4 vjet më parë kur Kryeministri emëroi drejtori e GKA-së.
Artisti nga Kosova Erzen Shkololli, është bërë i njohur si autor e kurator i ekspozitave dhe bienaleve ndërkombëtare.
