Elis Suçi ishte autori i grabitjes në filialin e postës shqiptare në Kamëz dy ditë më parë, ku nën kërcënimin e armës arriti të merrte 100 mijë lekë.
Pas arrestimit të tij dhe sekuestrimit të armës, kanë dalë në pah disa prova të reja që rëndojnë akuzat mbi Suçin. Mësohet se 30-vjeçari dyshohet të jetë paguar nga anëtarë të grupeve kriminale për të kryer vrasje.
Hetuesit po rishqyrtojnë çështje të mbetura pezull në vitin 2021, kur Suçi ka dalë nga burgu, ndërsa arma e tij është dërguar në laborator për tu analizuar në mënyrë që të kuptohet nëse është përdorur në ndonjë nga këto ngjarje.
Suçi ishte në kërkim edhe për disa grabitje të tjera të ndodhura në Kamzë gjatë muajve të fundit, por kishe arritur t’i shpëtonte policisë duke ndryshuar vendin ku qëndronte. Po ashtu ai ishte përfshirë dhe në një përplasje me armë në vitin 2021 me efektivët që kishin shkuar për ta arrestuar.
Edhe gjatë arrestimit pasditen e së mërkurës, Elis Suçi kërcënoi sërish uniformat blu me pistoletë.
Gjatë marrjes në pyetje, 30 vjeçari ka pranuar autorësitë e ngjarjeve të kryera prej tij, si grabitjet e ndodhura më herët dhe së fundmi atë të Postës Shqiptare. Ndërsa për goditjen me armë ndaj efektivëve të rendit një muaj më parë, Suçi ka pohuar se nuk ka qëlluar me armë drejt tyre, por në ajër.
Në Postë rezultoi se Suçi kishte grabitur duke kërcënuar dy sportelistët shumën prej rreth 1 milionë lekë të cilat iu sekuestruan nga policia.
Në pranga u vu edhe bashkëpunëtori i tij në grabitje, 20 vjeçari Algert Kurti, për të cilin gjykata caktoi arrest në burg.
