Një atentat me armë zjarri u regjistrua pasditen e djeshme në qytetin e Lushnjës, ndërsa shënjestër ishte një 44-vjeçar me precedentë penalë. Kujtim Meta po konsumonte kafe në një lokal në zonën e quajtur Stacioni i Trenit, kur një person i maskuar me syze të errëta e me kapuç në kokë, pasi ka hyrë brenda e ka qëlluar me armë zjarri tip pistoletë.
Burimet bënë me dije se atentatori ka përdorur armë tip silenciator dhe pasi e ka qëlluar është larguar nga vendi i ngjarjes.
Dëshmitarët okularë bënë me dije se autori i ngjarjes ishte i shoqëruar me një person tjetër në momentin kur kreu atentatin.
Ata thanë gjithashtu se nuk e kishin kuptuar se çfarë po ndodhte pasi kishin besuar se personi i maskuar i kishte dhënë diçka 44-vjeçarit, por gjithçka është bërë e qartë kur ai është rrëzuar nga tavolina e lokalit ku konsumonte kafe dhe ka përfunduar në tokë si pasojë e plumbave të marrë në trup.
Meta ishte i vetëm në tavolinë dhe pranë tij nuk kishte persona të tjerë, megjithëse atentatori duket se e ka pasur të qartë shënjestrën e tij. Personi i dytë që shoqëronte atentatorin, e ka ndihmuar atë të largohet me shpejtësi nga vendi i ngjarjes.
“Rreth orës 16:15, në afërsi të stacionit të trenit, Lushnjë, në rrethana ende të paqarta është plagosur me armë zjarri shtetasi K. M., 44 vjeç, banues në Saravë, Lushnjë, i cili ndodhet në spital nën kujdesin e mjekëve. Shërbimet e Policisë dhe grupi hetimor po vijojnë punën intensive për identifikimin e autorit dhe zbardhjen e plotë të ngjarjes”, sqaroi shkurtimisht Policia.
Ende nuk dihet nëse ngjarja ka të bëjë me larje të hesapeve të vjetra në qytetin e Lushnjës.
HETIMET
Kujtim Meta, 44-vjeç, mori dy plumbave në pjesën e barkut, duke përfunduar në gjendje të rëndë shëndetësore në spital.
Pasi ka marrë ndihmën e parë mjekësore në Spitalin e Lushnjës, ai është dërguar me urgjencë për në Spitalin e Traumës në Tiranë për mjekim më të specializuar.
Forcat e Rendit pasi shkuan në vendin e ngjarjes, nisën hetimet për të zbardhur rrethanat. Hetues it kanë sekuestruar kamerat e sigurisë në zonë në përpjekje për të marrë më shumë të dhëna rreth atentatorëve.
Meta ka pasur njohje të ngushta me shtetasin, Besmir Hida, i ekzekutuar më 1 tetor të vitit 2019 në Lushnjë, ngjarje ende e pazbardhur.
Meta punonte si shofer në kompaninë e viktimës, i cili merrej me tregtinë e makinave. Hida ishte daja i Zamir Latifit, i njohuri si anëtar i bandës së Aldo Bares. Ende nuk dihet nëse ngjarjet kanë lidhje me njëra-tjetrën.
