Autori i vrasjes së Taulant Beqiraj, Elton Hajnaj u dënua me 21 vite burg. Gjithashtu dhe 2 shokët e tij Hans Jonuzaj dhe Skerdjan Gabrani , janë dënuar me nga 6 vite burg secili si përkrahës të autorit të krimit.
Kujtojmë se ngjarja ka ndodhur më 3 mars të një viti më parë, pranë Gjykatës së Apelit ku është ekzekutuar me armë 31-vjeçari, Taulant Beqiraj.
Atentati ka ndodhur në momentin kur viktima ishte duke ecur në këmbë në trotuar.
Autori i vrasjes, sipas dëshmitarëve okularë, ka zbritur nga një mjet, i pa maskuar, dhe ka qëlluar me breshëri ndaj Beqirajt duke e lënë të vdekur në vend.
Pas vrasjes, autori është larguar me autoveturën tip Ford, dhe ka arritur të largohet ndërsa pas ndjekjes është kapur një prej shokëve të tij ndërsa shoku tjetër është dorëzuar disa ditë më pas.
Hajnaj është akuzuar si autori kryesor që ka shkrepur armën dhe vrarë të riun në rrugën transballkanike.
Ndërkohë, viktima mëngjesin e vrasjes ka kërkuar një shumë lekësh borxh që nuk dihet se kujt, dhe po ashtu ka komunikuar në telefon me autorët. Kanë qenë tabulatet telefonike që kanë faktuar bisedat e zhvilluara mes viktimës dhe autorëve.
