Imazhet satelitore që tregojnë trupa të vdekur të rreshtuar në rrugët e Bucha javë më parë, duket se kanë hedhur poshtë pretendimet ruse se ata ishin vendosur atje pasi trupat e tyre u larguan nga qyteti ukrainas.
Autoritetet në Ukrainë thanë se trupat e të paktën 410 civilëve janë gjetur në zona jashtë Kievit – veçanërisht në qytetin e Bucha – pas tërheqjes së javës së kaluar të trupave ruse.
Imazhet e tmerrshme tregojnë shumë civilë me duar të lidhura, plagë të shkaktuara me armë zjarri nga afër dhe shenja torture. Lidhur me këtë ngjarje të rëndë, një numër në rritje i liderëve botërorë kanë shprehur zemërim dhe kanë bërë thirrje për sanksione më të ashpra kundër Moskës.
Nga ana tjetër, ministri i Jashtëm i Rusisë, Sergey Lavrov, hodhi poshtë akuzat se trupat ruse kryen mizoritë dhe e konsideron si “provokim të inskenuar”.
Ndërkohë Ministria ruse e Mbrojtjes lëshoi një deklaratë të gjatë, ku tha se asnjë civil nuk kishte pësuar dhunë nga trupat ruse dhe se imazhet ishin të inskenuara.
Megjithatë, analiza e imazheve satelitore nga “New York Times” dhe imazheve të lëvizshme e të palëvizshme nga kontrolluesit e fakteve në BBC kundërshtojnë mohimin e Rusisë.
NYT ka marrë imazhe satelitore të arkivuara, të cilat më pas i ka krahasuar me fotot e marra nga anëtarët e medias në terren në Bucha. Ata thonë se këto imazhe vërtetojnë se trupat ishin aty përpara se forcat ruse të tërhiqeshin më 30 mars.
Gazeta në fjalë ka krahasuar deri në 11 trupa në rrugë, në një video të realizuar nga një banor më 2 prill me një imazh satelitor nga 11 marsi – kur Rusia po pushtonte qytetin. Nga këto vërtetime të këtyre imazheve rezulton se trupat e pajetë kishin qenë atje për javë të tëra.