Sot mbushet një muaj që prej momentit kur Rusia nisi sulmet dhe pushtimin ndaj Ukrainës. Që prej 24 shkurtit, mijëra ukrainas janë detyruar të largohen nga shtëpitë e tyre, për t’i shpëtuar vdekjes së sigurt, teksa ushtria e Putinit vazhdon të intensifikojë bombardimet.
Sipas një raporti të UNICEF, një në çdo dy fëmijë ukrainas është zhvendosur që kur Rusia filloi pushtimin e saj.
“Është befasuese,” – tha për CNN zëdhënësi i UNICEF-it, James Elder.
“Që nga fillimi i luftës një muaj më parë, nga çdo djalë dhe vajzë në vend, një në dy tani është dashur të ikin nga shtëpitë e tyre. Është një situatë që nuk e kemi parë më parë, jo në kujtesën e gjallë dhe është pothuajse e pamundur të përballemi me të.”- tha Elder.
Elder tha se UNICEF po përpiqet të marrë batanije, tableta për pastrimin e ujit, gjeneratorë, pajisje mjekësore dhe komplete obstetrike për nënat që lindin në vend.
“Nëse lufta nuk ndalet, nëse nuk ndalen sulmet pa dallim, ne do të shohim më shumë fëmijë të dëbuar nga shtëpitë e tyre dhe bombardimet.”- tha ai.
