Mediat italiane kanë publikuar detaje të reja për funksionimin e grupit të trafikut të drogës të shkatërruar sot në Romë, ku ishte e përfshirë artistja shqiptare Elsa Lila.
Sipas shtypit italian anëtart e grupit kishin përdorur një lokal në Acilia si bazë për trafikun e drogës ku kryenin takime për të ndarë punët dhe për të menaxhuar lëvizjen në rrethe të ndryshme të Romës.
Droga ruhej në një magazinë në zonën e Torrevecchia. Gjatë operacionit të finalizuar në orët e para të mëngjesit të sotëm policia ka sekuestruar më shumë se një ton drogë.
Grupi drejtohej nga dy persona, një italian dhe një shqiptar. Ky i fundit është aktualisht në kërkim nga policia pasi dyshohet se është arratisur jashtë vendit.
Ata menaxhonin tregtinë e lëndës narkotike në Romë dhe më pas e shpërndanin atë në të gjithë territorin. Porositë nga baza niseshin në filialet që ata kishin ngritur në të gjithë kryeqytetin italian.
Elsa Lila, këngëtarja shqiptare e vënë në pranga menaxhonte të gjitha llogaritë financiare të grupit. Më pas në skemë u përfshi edhe boskieri shqiptar Petrit Bardhi.
