Moti i keq që ka përfshirë vendin tonë në orët e fundit ka sjellë një sërë problematikash në qarkullimin e automjeteve sidomos në bypass-in e rrugës së Arbrit dhe në Qafë Murrizë.
Policia e Shtetit përmes një njoftimi për mediat bën me dije se për shkak të shtimit të fluksit të lëvizjes së qytetarëve gjatë fundjavës ka shtuar masat e sigurisë dhe bën apel drejtuesve të automjeteve që të jenë të kujdesshëm.
“Për shkak të kushteve të motit me reshje shiu dhe dëbore, në disa akse dhe segmente rrugore janë krijuar vështirësi në qarkullimin e automjeteve, kryesisht në bypass-in e rrugës së Arbrit dhe në Qafë Murrizë është vështirësuar qarkullimi i automjeteve.
Policia e Shtetit, nisur dhe nga fakti që në fundjavë ka lëvizje të shtuara drejt zonave turistike dhe atyre bregdetare, si dhe për shkak të motit të keq në disa zona, ka marrë një sërë masash emergjente, duke rritur prezencën e shërbimeve me uniformë, në të gjitha rrugët e vendit, me qëllim parandalimin e aksidenteve rrugore, si dhe për t’u ardhur në ndihmë përdoruesve të rrugës, në rast nevoje, për shkak të motit të keq.
Policia e Shtetit apelon për të gjithë drejtuesit e mjeteve që të rrisin kujdesin gjatë kalimit në të gjitha akset rrugore, pasi ka prezencë të ujit dhe të dëborës, të vendosin rripin e sigurimit, të mos përdorin celularin gjatë drejtimit të mjetit, të mos qarkullojnë me shpejtësi, të mos kryejnë parakalime dhe të mos drejtojnë mjetin nën ndikimin e alkoolit apo më keq akoma në gjendje të dehur.
Në zonat malore drejtuesit e mjeteve të përdorin gomat dimërore dhe në çdo rast të kenë me vete pajisjet antirrëshqitëse.
Për çdo nevojë dhe problematikë telefononi në 112 ose dërgoni mesazhe në Komisariatin Dixhital, ju garantojmë ndihmë të menjëhershme nga ana e shërbimeve të Policisë Rrugore’, thuhet në njoftimin e policisë.
