Kryetarja e LSI-së, Monika Kryemadhi, vijon denoncimet për aferën e inceneratorëve. Këtë herë ajo ka publikuar emrat dhe fotot e dy pronarëve të kompanive fiktive, për të cilët thotë se i kanë dhënë ish-ministrit Lefter Koka 500 mijë euro.
Arbër Denizi dhe Skerdi Bello janë 2 pronarët e kompanive fiktive PIVOT-04 dhe A.S Group sipas Kryemadhit, ndëkrohë që kryetarja e LSI-së i bën thirrje SPAK që të urdhërojë ndalimin e pagesave për inceneratorit të Tiranës.
Postimi i Monika Kryemadhit:
Nga njëra anë rriste taksat, e nga ana tjetër, Erion Veliaj i siguronte me firmën e tij, pa miratimin e Këshillit Bashkiak, një pagesë minimale të garantuar për 30 vjet, inceneratorit të Tiranës.
Lefter Koka, tashmë me CV të pasur nga Elbasani dhe Fieri, ka përfituar deri në dhjetor 2021, të paktën 500 mijë euro nga inceneratori i Tiranës.
Po po, është e vërtetë, mos u habisni, ish Ministri Koka ka marrë qokë 500 mijë euro deri në atë moment, përmes dy kompanive fiktive të lidhura me të, PIVOT-04 dhe A.S Group.
SPAK duhet menjëherë të urdhërojë Qeverinë dhe Bashkinë e Tiranës të ndalojë pagesat ndaj inceneratorit, roli i vetëm i të cilit ka qënë qarkullimi i parave nga buxheti i Qeverisë dhe Bashkisë në xhepat e Rilindjes!
Ruaj bindjen e plotë, se edhe përtej intimidimit nga qeveria dhe Erion Veliaj, i cili është kapur edhe në përgjim duke prezumuar se ka nën kontroll prokurorët e SPAK, ata do të dijnë të ngrihen në lartësinë e detyrës. Kanë mbështetjen time të plotë dhe inkurajoj të gjitha institucionet vendase dhe të huaja, t’i shprehin publikisht mbështetjen në këtë moment vendimtar!
Ky është moment integriteti, dhe e vërteta do na çlirojë të gjithëve!
