Petrit Mamaj, autori i dyshuar i vrasjes së bashkëshortes së tij, Valentina Mamaj, u la sot në arrest me burg nga gjykata e Fierit.
Avokati i tij tregoi se motivi i krimit ishte pretendimi që kishte autori se bashkëshortja dhe një i afërm i saj i kishin bërë një gjilpërë në gjumë me qëllim për ta vrarë.
Në prononcimin e siguruar nga “Panorama.al” avokati tregon se klienti i tij Petrit Mamaj e kishte gjetur bashkëshorten në gjumë dhe pasi i kërkoi shpjegime për gjilpërën e qëlloi me thikë duke e lënë të vdekur.
Autori doli nga shtëpia duke ngrënë në mensë dhe gënjeu vëllain e viktimës duke i thënë se motra e tij kishte vrarë veten. Ndër të tjera avokati thotë se i kishte komshij autorin dhe viktimën, dhe Petrit Mamaj ishte i paekulibruar si person.
“Reagimi i tij në sallë ishte i tronditur, por realisht e pranoi krimin, duke e përshkruar se si kishte ndodhur rreth orës 06:00 të mëngjesit. Motivi ishte acarimi i marrëdhënieve familjare dhe pretendonte se bashkëshortja bashkë me një të afërmin e vet i kishin bërë një gjilpërë në gjumë, për ta vrarë.
Kërkesa e prokurorit ishte e drejtë, e ligjshme. Vrasja që ka ndodhur dje ka indinjuar të gjitha familjet. Unë e kam komshi këtë rast konkret, kanë pasur divergjenca si çdo familje, por jo në këto përmasa. Ishte i paekuilibruar”, tha avokati.
“Me të nuk flitej dhe as dëgjohej. E kishte gjetur në gjumë, pasi flinin të ndarë gjatë kësaj kohe. Ai kishte shkuar rreth orës 6:00 në mëngjes dhe i kishte thënë: pse ma keni bërë gjilpërën?! Gjatë kësaj kohe kishte marrë dhe thikën dhe e kishte goditur dhe e kishte lënë të vrarë.
Më pas iku te një lokal dhe hëngri mëngjes dhe më pas kishte shkuar te i vëllai dhe i kishte thënë, ka vrarë veten. Pasi kishin bërë ekzaminim mjeku ligjor, ai kishte pohuar se kishte kryer vrasjen, për motivet që sqarova“, shton ai
