Është shënuar një vit nga vdekja e mjekut të njohur neurolog në qendrën Spitalore Universitare “Nënë Tereza”, Drini Dobi, i cili e humbi betejën me koronavirusin. Ai la pas vlera të shkëlqyera në fushën profesionale, ndërsa përsa i përket jetës private, la dy fëmijë dhe bashkëshorten, Florida.
E ftuar në “ABC e Pasdites” me Ermal Peçin, vajza e tij, Ersi foli për herë të parë për ndarjen nga jeta të të atit.
“Mua më mungon ai nga maja e gishtit te qimja e flokut, por ndihem shumë krenare kur njerëz e kanë dashur po aq sa ne.
Babi nuk më llastonte. Më llastonte goxha po jo llastim të keq, ai dinte çdo gjë. Edhe kur kisha rroba për të larë, edhe unë dija çdo gjë për të. Ai më fliste për profesionin, për çdo gjë”, tha fillimisht ajo.
Më tej, Ersi tregoi se po vazhdon studimet për mjekësi, për të ndjekur profesionin e të atit.
“Babi e ka patur një dëshirë shumë të madhe që unë të merrja studimin më të mirë të mundshëm. Në kohën që nis pandemia, une u ktheva nga Kanadaja për pushimet e verës dhe mësimet i kisha online. Kështu po e shtyja largimin tim, rrodhën gjërat dhe u ktheva këtu, ku transferova kreditet ato që mundeshin, edhe pse dëshira është për jashtë”.
Ersi u shpreh e përlotur se do të donte ta përqafonte edhe një herë. Ajo, madje u ndal edhe te libri mjekësor që ka përkthyer “Të gjesh ku fle lepuri” dhe për ndihmën që i kanë dhënë prindërit.
“Do doja që ta përqafoja edhe një herë. Çdo kush do të iki nga kjo botë herët apo vonë, por është shumë e rëndësishme t’i vlerësosh gjërat kur i ke.
Babai im ishte një person që kishte shumë shije, vdiste për artin, na blinte librat me poezi që ne të lexonim. Por unë kam marr vetëm pak nga ai. Në shkollë kam qenë e mirë në letërsi, zyshat më kishin qejf, po jo se e zhvillova shumë si pasion.
Ai më ndihmonte me termat mjekësor, ndërsa unë i përktheja. U botua tani së fundmi, unë nuk e prisja kurrë. Është një gjë prindërit e mi e donin dhe u bë”, u shpreh e bija e mjekut të ndjerë.
