Duke sfiduar të gjitha shanset, socialistët e qendrës së majtë në pushtet në Portugali fituan një shumicë të plotë parlamentare në zgjedhjet e përgjithshme të parakohshme të së dielës, duke siguruar një mandat të ri të fuqishëm për kryeministrin, Antonio Costa.
Rezultati, i rritur nga një pjesëmarrje më e lartë se sa pritej, pavarësisht nga pandemia e koronavirusit, erdhi si befasi pasi socialistët kishin humbur pjesën më të madhe të avantazhit të tyre në sondazhet e fundit. Kjo do të thotë që Portugalia do të ketë një qeveri të qëndrueshme për të mbikëqyrur zbatimin e fondeve të BE-së për rimëkëmbjen e pandemisë.
Costa tha në fjalimin e tij të fitores herët të hënën: “Një shumicë absolute nuk do të thotë pushtet absolut. Nuk do të thotë të qeverisësh vetëm. Është një përgjegjësi e shtuar dhe do të thotë të qeverisësh me dhe për të gjithë portugezët.”
Vetëm pas orës 1 të mëngjesit në Lisbonë, socialistët u konfirmuan se fituan 117 vende në parlamentin me 230 vende, nga 108 të fituara në zgjedhjet e 2019-ës. Më herët, kur Costa tha se partia kishte fituar 117 ose 118 vende, mbështetësit e tij shpërthyen në festime të forta, duke kënduar himnin e vjetër revolucionar “Grandola” dhe duke valëvitur flamuj.
Pas sondazheve të opinionit të javës së kaluar, vetë Costa pranoi se portugezi nuk donte t’i jepte atij një shumicë të plotë dhe tha se ishte i përgatitur të lidhte aleanca me partitë me të njëjtin kah politik, gjë që tani nuk është më e nevojshme.
Social Demokratët e qendrës së djathtë dolën në vendin e dytë me nën 30% të votave, sipas rezultateve të përkohshme, kundrejt rezultatit të socialistëve prej rreth 42%.
Chega e ekstremit të djathtë doli si forca e tretë parlamentare më e madhe, duke bërë një hap të madh nga vetëm një vend në legjislaturën e mëparshme në të paktën 11 %.
