Pas vendimit të Gjykatës Kushtetuese, i cili la në fuqi si të ligjshme zgjedhjet vendore të 30 qershorit 2019, tashmë vendi mund të shkojë shumë shpejt në zgjedhje të pjesshme
Ndryshe nga zgjedhjet e rregullta, të cilat duhet të zhvillohen në periudhat pranverë/vjeshtë, zgjedhjet e pjesshme mund të bëhen në çdo periudhë, 30 ditë nga dekretimi i Presidentit të Republikës. Që prej dorëheqjes nga marrja e mandatit të kryetarit të Bashkisë së Shkodrës, Valdrin Pjetri, në korrik 2019, Presidenti Meta nuk pranoi të shpallte përsëritjen e zgjedhjeve në këtë bashki. Bashkia e Shkodrës vijon të drejtohet nga Voltana Ademi, edhe pse është 2 vite e gjysmë përtej mandatit ligjor. Dorëheqjet dhe largimet vijuan edhe në bashki të tjera, ku kryetarët e zgjedhur u prekën nga ligji i dekriminalizimit.
Edhe në këtë kohë Presidenti nuk dekretoi një datë për zgjedhje të pjesshme. Kreu i shtetit nuk i njihte zgjedhjet e 30 qershorit, të cilat i zhdekretoi ato duke vendosur një datë tjetër të zhvillimit të tyre. Këtë dekret të Presidentit Komisioni i Venecias e cilësoi antikushtetues. Meta i ishte drejtuar Gjykatës Kushtetuese për t’i cilësuar jolegjitime zgjedhjet e 30 qershorit. Një vendim i tillë nga kjo gjykatë do të çonte në zgjedhje të reja në të gjithë vendin. Por vendimi i djeshëm i Gjykatës Kushtetuese e hoqi mundësinë për zgjedhje të reja. Në këto kushte, Presidentit të Republikës i duhet të shpallë një datë për zgjedhje të pjesshme në 7 bashki, të cilat drejtohen pa kryetar të zgjedhur.
Zgjedhjet vendore të pjesshme duhet të zhvillohen 30 ditë pas ditës së shpalljes së dekretit të Presidentit. PD Dilema këto ditë për një raund, qoftë edhe të pjesshëm të zgjedhjeve, është paraqitja e Partisë Demokratike në to. Demokratët gjenden në momentin më të vështirë të tyre, kur brenda partisë ka shpërthyer një polemikë mes ish-kryetarit Sali Berisha dhe kreut aktual, Lulzim Basha. Basha e përjashtoi Berishën nga Grupi Parlamentar deri në sqarimin e akuzave të SHBA-së ndaj tij si person “non grata” për korrupsion domethënës. Duket se partia është e ndarë në dy pjesë, gjë që vështirëson përfaqësimin e saj në këto zgjedhje vendore të pjesshme.
Kandidatët që do të propozojë Lulzim Basha nuk do të mbështeten, madje do të luftohen si të blerë nga Rama nga ish-kryetari demokrat Sali Berisha. Kjo përplasje e brendshme në PD rrezikon që rezultati i demokratëve në këto zgjedhje të pjesshme të jetë shumë i dobët duke favorizuar maxhorancën socialiste në pushtet.
VAKANCAT
Pas këtij vendimi, pritet që Presidenti Meta të dekretojë zhvillimin e zgjedhjeve të pjesshme për 6 bashkitë që kanë mbetur pa kryetar të zgjedhur. Sipas Kushtetutës, 45 ditë nga dekreti i Presidentit zhvillohen zgjedhjet në ato bashki të cilat kanë ngelur pa kryetar të zgjedhur. Shkodra ishte bashkia që do të krijonte precedentin e parë të drejtimit pa kryetar. Në zgjedhjet lokale të qershorit 2019, për shkak se prekej nga ligji i dekriminalizimit, Valdrin Pjetri dha dorëheqjen nga marrja e detyrës.
Ndaj, në krye të Bashkisë vijon të jetë Voltana Ademi, mandati i së cilës ka përfunduar prej 2 vitesh. Saga e bashkive pa kryetar do të vazhdonte më pas me Durrësin. Pas një deklarate të pamatur pak ditë pas tërmetit tragjik të 26 nëntorit, kryetarja Valbona Sako dha dorëheqjen nga posti, për t’u zëvendësuar me Emirjana Sakon. E radhës do të ishte Bashkia e Vorës, ku shkak do të bëhej sërish ligji i dekriminalizimit, i cili do të prekte kryetarin e saj, Agim Kajmaku.
Ky i fundit u zëvendësua nga Gentian Picari. Ndarja nga jeta e kryetarit të Bashkisë Rrogozhinë, Haxhi Memolla, do të vendoste në krye të këtij institucioni nipin e këtij të fundit, Edision Memollën. Ndërsa në zgjedhjet parlamentare të 25 prillit, kryetari i Bashkisë Dibër, Dionis Imeraj, do të garonte për deputet, ndaj karrigen e tij në krye të Bashkisë e zuri Shkëlqim Murrja. I fundit që do të mbyllte sagën e bashkive pa kryetar ishte kryebashkiaku i Lushnjës, Fatos Tushe, i cili u shkarkua nga Kryeministri Rama pasi u arrestua për korrupsion nga SPAK-u. Vendin e tij e zuri nënkryetarja e Bashkisë, Eriselda Sefa.
SHKODËR
është dorëhequr Valdrin Pjetri për shkak të dekriminalizimit, drejtohet nga Voltana Ademi
DURRËS
Valbona Sako dha dorëheqjen, e komanduar Emirjana Sako
VORË
Dorëhiqet Agim Kajmaku për shkak të dekriminalizimit, i komanduar Gentian Picari
DIBËR
Dionis Imeraj, dorëhiqet për shkak se garoi për deputet, komandohet Shkëlqim Murrja
RROGOZHINË
Ndahet nga jeta Haxhi Memolla, komandohet në krye të bashkisë nipi i tij, Edision Memolla
LUSHNJË
Fatos Tushe arrestohet për korrupsion, komandohet nënkryetarja e Bashkisë, Eriselda Sefa
MALLAKASTËR
Qerim Ismaili, i arrestuar nga SPAK, i prekur nga ligji i dekriminalizimit, nuk deklaroi dënimin në Greqi
