Kancelarja në largim e GjermanisëAngela Merkel vazhdon të gëzojë një reputacion të mirë jashtë Gjermanisë dhe asaj i besohet më shumë se Joe Biden, Vladimir Putin, Xi Jinping ose Emmanuel Macron, sipas një sondazhi të ri të publikuar nga Qendra Kërkimore Pew.
Cilat janë gjetjet e studiuesve?
Qendra Kërkimore Pew është një qendër jopartiake me qendër në Uashington D.C, e cila kryen sondazhe, kërkime demografike dhe analiza përmbajtjeje. Raporti i fundit ka grumbulluar të dhëna nga 16 sondazhe publike në vendet me ekonomi të përparuara.
Kancelarja gjermane mori vlerësimin më të lartë të besimit në krahasim me udhëheqësit e SHBA, Rusisë, Kinës dhe Francës.
77% e të anketuarve shfaqën besimin se Merkel do të bënte gjënë e duhur në lidhje me çështjet ndërkombëtare. Megjithatë mendimi pozitiv nuk ishte i dallueshëm në Greqi, ku vetëm 30% e të anketuarve kishin besim se Merkel po bënte gjënë e duhur. Qeveritë greke dhe gjermane janë përplasur vazhdimisht gjatë krizës së borxhit në eurozonë, e cila mbi një dekadë më parë paralizoi ekonominë e Greqisë.
Po gjermanët dhe europianët e tjerë?
Angela Merkelgëzon gjithashtu besimin e gjermanëve që kur u zgjodh kancelare. Më shumë se 2/3 e tyre e kanë ruajtur këtë besim gjatë gjithë rrugëtimit të saj.
Në vitin 2021 shifrat janë akoma më të larta, ku 77% e të anketuarve kanë besim tek udhëheqësja e tyre, e cila i jep fund karrierës së saj politike pas zgjedhjeve parlamentare të kësaj jave.
Anketuesit gjithashtu e shtrinë studimin në tetë vende të tjera europiane, përfshirë Francën, Britaninë e Madhe dhe Italinë. Shtatë nga 10 persona në vendet e anketuara janë të bindur se Merkel do të bëjë gjënë e duhur në bashkësinë ndërkombëtare. Ndërsa në Holandë dhe Suedi, nëntë në 10 persona mendojnë njësoj.
Cilat janë ndjenjat e përgjithshme ndaj Gjermanisë?
Studimi nxorri në pah se 79% e të anketuarve kanë konsideratë për shtetin gjerman.
Ata gjithashtu mendojnë se qeveria gjermane e menaxhoi siç duhet pandeminë e COVID-19, më mirë se Organizata Botërore e Shëndetësisë, Kina, Bashkimi Europian dhe Shtetet e Bashkuara.
Tetë nga 10 vetë të pyetur në Greqi, mendojnë se Gjermania ka shumë ndikim. Të njëjtin shqetësim ndanë edhe shumica e italianëve dhe spanjollëve.
