Pesë persona kanë përfunduar në prangat e Policisë së Lezhës nën akuzën e shitjes së drogave të forta.
Gjatë kontrollit të një automjeti në fshatin Tale, me drejtues shtetasin Altin Biçaku, është gjetur një sasi lëndë narkotike e dyshuar kokainë, e ndarë në doza gati për shitje dhe një peshore, të cilat u sekuestruan në cilësinë e provës materiale, së bashku me automjetin dhe 5 aparate celularë.
“Në bazë të informacioneve të marra në rrugë operative se disa shtetas që qarkullonin në një automjet kishin lëndë narkotike të ndarë në doza gati për ta shitur, kanë organizuar punën dhe në fshatin Tale, Lezhë, kanë lokalizuar dhe ndaluar automjetin e dyshuar”, sqaroi Policia.
Përveç drejtuesit të makinës, në pranga përfunduan edhe pasagjerët, përkatësisht Fatmir Suti, 29 vjeç, Ervistjan Gjergji, 23 vjeç, Altin Biçaku, 29 vjeç, Bongjov Korriku 21 vjeç dhe Arsid Stojani 23 vjeç, të gjithë banues në Kurbin.
Gjatë kryerjes veprimeve hetimore në ambientet e Drejtorisë Vendore të Policisë Lezhë, shtetasi Fatmir Suti ka tentuar të largohet duke u hedhur nga dritarja, ku për pasojë ka marrë dëmtime dhe është dërguar në spitalin e Traumës, Tiranë.
Policia sqaron se i riu ndodhet jashtë rrezikut për jetën. Ndërkohë, në zonën e Palasës në Himarë, Policia arrestoi në flagrancë shtetasit, Ingrid Jaçe, 29 vjeç, banues në Tiranë dhe Dino Xhelili, 23 vjeç, banues në Orikum.
“Arrestimi i tyre u bë pasi, këta shtetas në bashkëpunim me njëri-tjetrin, u konstatuan duke i shitur lëndë narkotike shtetasit Enio Hajdini. Gjatë kontrollit të ushtruar ndaj dy shtetasve të arrestuar, janë gjetur dhe sekuestruar në cilësinë e provës materiale doza me lëndë narkotike kokainë dhe kanabis, 1 aparat celular dhe një shumë parash të dyshuara të përfituara nga kjo veprimtari kriminale.
Në vijim të veprimeve u procedua në gjendje të lirë dhe shtetasi Enio Hajdini, 20 vjeç, banues në Tiranë”, sqaroi Policia. Materialet i kaluan Prokurorisë së Rrethit Gjyqësor Vlorë, për veprën penale “Prodhimi dhe shitja e narkotikëve”.
Në Malësinë e Madhe, një vajzë 23-vjeçare me iniciale E. M. dhe një 15 vjeçar me iniciale E.P, u arrestuan pas sekuestrimit të 10 kg kanabis dhe një armë zjarri pistoletë. Ndërkohë, janë shpallur në kërkim: M.Th, 59 vjeç; D.Th, 51 vjeç; E.Th, 24 vjeç; D.Th, 20 vjeç; (familjarë të shtetases së arrestuar) dhe M.P, 48 vjeç, (babai i 15-vjeçarit).
Gjatë kontrollit në banesën e shtetases E.M, Policia gjeti 10 kg kanabis dhe një armë zjarri pistoletë. Në një territor të pyllëzuar pranë banesës së 23-vjeçares janë konstatuar të kultivuara bimë të kësaj lënde narkotike. Ndërsa gjatë kontrollit në banesën e 15-vjeçarit u gjetën 200 gramë kanabis.
