Gjykata e Apelit në Shkodër ka dënuar me 14 vite burg shtetasin Rinard Tota, i njohur edhe si Frederik Tota, i akuzuar nga Policia e Shtetit si kreu i një grupi kriminale që menaxhonte veprimtarinë e prostitucionit në qytetin e Shkodrës.
Tota u arrestua me bujë në vitin 2018 për shfrytëzimin prostitucioni.
Gjatë seancës së djeshme, Apeli ndryshoi vendimin për kushëririn e Totës, Kastriot Musa, duke e dënuar me 7 vite burg, nga 5 vite që e kishte dënuar Gjykata e Shkallës së Parë, dënim të cilin e ka kryer edhe për shkak të periudhës së paraburgimit.
Ndërkohë, shtetasja Sonila Mehja, 36 vjeçe, gjithashtu e arrestuar në kuadër të operacionit “Balerinat”, është dënuar me 8 vite burg nga 9 vite që u dënua nga një shkallë më poshtë e gjyqësorit.
Ndryshe nga Gjykata e Shkallës së Parë, e cila vendosi që lokali 3 katesh në lagjen “Xhabiej” në Shkodër ku është ushtruar prostitucioni t’i kthehet 54-vjeçarit Frederik Tota, Gjykata e Apelit vendosi që kati i dytë dhe i tretë i kësaj ndërtese t’i kalojë si pasuri shtetit shqiptar, pasi dyshohet se këto dy kate janë ndërtuar përmes veprimtarive të paligjshme.
Frederik Tota u arrestua më 18 nëntor të vitit 2017 në kuadër të operacionit “Balerinat”, i cilësuar si kreu i grupit kriminal. Gjatë operacionit, 7 persona përfunduan në pranga duke u dënuar me burg vetëm tre prej tyre.
Në atë periudhë u sekuestrua edhe ndërtesa, dy automjete tip “Benz” dhe “Land-Rover” në pronësi të 54- vjeçarit, një armë zjarri pistoletë, shtatë ora dore dhe një sasi e konsiderueshme bizhuterish floriri të ndryshme. Gjithashtu u sekuestrua edhe një “Laptop” dhe 8 telefona celularë të markave të ndryshme si dhe një sasi parash të fituara nga ky aktivitet kriminal në prerje të ndryshme lek, euro, dollarë etj.
AKUZAT
Frederik Tota, i dënuar edhe për vrasje më shumë se 20 vite më parë, është shpallur fajtor për veprat penale “Shfrytëzim Prostitucioni”, “Mbajtje e lokaleve për prostitucion”, “Ushtrim pa licencë i veprimtarive financiare”, “Pastrim i produkteve të veprës penale ose veprimtarisë kriminale”, “Vjedhje e energjisë elektrike ose impulsive telefonike” dhe “Ndërtim i Paligjshëm”.
I akuzuari nuk i ka pranuar asnjëherë akuzat e ngritura ndaj tij, duke theksuar se lokali i tij nuk është përdorur për prostitucion. Pavarësisht pretendimeve, Apeli i Shkodrës e dënoi atë dhe dy bashkëpunëtorët me 29 vite burg.
Pas vendimit të formës së prerë të Apelit, Kastriot Musa, do të duhet të kthehet sërish në qeli. Musa do të duhet që të bëjë edhe dy vite të tjera sapo të zbardhet vendimi, por ai thotë se nuk e ka ndër mend që të vetëdorëzohet.
Ai thotë se prokuroria nuk ka pasur prova ndaj tij dhe djalit të tezes, duke deklaruar se vajza që ka dhënë dëshmi nuk njihej prej tyre.
“Unë nuk e di përse prokuroria dhe gjykatat nuk kanë hapur kamerat e lokalit, duhet që të hapen dhe të shihet se çfarë është bërë në atë lokal. Prokuroria pretendonte se kati i dytë ku unë kam jetuar me gruan time është përdorur për prostitucion. Kamerat janë për 45 ditë me regjistrim dhe si ka mundësi që për 45 ditë aty nuk është ngjitur askush përveç meje dhe gruas që kemi pasur shtëpinë dhe djalit tezes time dhe punonjëses që ka jetuar aty”, tha ai.
