Kreu i DPSHTRR, Blendi Gonxhe ka treguar një skenë nga Sauku, ku një prind me shpejtësi 100 km në orë mban para vetes në timon fëmijën 6-8 vjeç.
Përmes një shënimi në rrjetet sociale Gonxhe rrëfen se i bëri shenjë drejtuesit të makinës: “Je çmendur? A je në vete?”, ndërsa ai reagoi duke e hedhur fëmijën te krahu i pasagjerit, në këmbë, i pa lidhur me rrip sigurimi.
Postimi i plotë i Gonxhes!
Kthehesha nga puna, në unazë, segmenti Sauk-TEG, një Volvo SUV hyn në parakalim në kthesë pa sinjal, e arrij dhe ç’të shikoj! Fëmija 6-8 vjeç në timon, koka e fëmijës trupimët te xhami, prindi shofer po argëtohej me 80-100 kmh me të birin sandviç mes tij dhe timonit! I bëj shenjë me kujdes: -je çmendur? A je në vete?!!! Reagoi duke e hedhur fëmijën te krahu i pasagjerit, në këmbë, i pa lidhur me rrip sigurimi, në ecje! Prindi një mesoburrë, mbeta pa fjalë, i shokuar dhe i trishtuar.
Nuk arrita të filmoja dot skenën por hyra në shtëpi gjakprishur. Imagjinoni çfarë shembulli merr ai fëmijë, truri i tij sfungjer që krijon që tani nocionet më të gabuara, rreziku, papërgjegjshmëria, kurajo e atij prindi në mes të ditës në një nga akset më të trafikuara të kryeqytetit, tmerr! Mungon Edukata baze!
Po ndaj këtu linkun e Breaking (Top News) sot, sepse prekte sjelljen e VIP-ave e celebriteteve që harrojnë se sa keq ndikojnë me pakujdesinë e tyre duke shkelur rëndë rregullat e qarkullimit rrugor!
