Gjykata Kushtetuese e vendosi veten në pamundësi të marrjes së një vendimi për kushtetutshmërinë e zgjedhjeve lokale të 30 Qershorit 2019 pasi mori në shqyrtim një padi të Shoqatës së Bashkive. Shtatë anëtarët e kushtetueses preferuan ta gjejnë zgjidhjen në Komisioninin e Venecias.
Të gjitha palët në seancën e të Mërkurës u ndalën gjatë në ç’dekretimin e 30 Qershorit nga presidenti Ilir Meta megjithëse pikërisht për këtë episod, që solli edhe nisjen e përplasjes mes qeverisë dhe presidencës, Komisioni Venecias e ka dhënë opinionin e vet në Tetor 2019. Në opinionin për “Kompetencën e presidentit për të caktuar datën e zgjedhjeve” kërkuar nga Kuvendi Shqipërisë, Komisioni i Venecias mbërriti në këtë përfundim:
“Presidenti mund t’i anulojë zgjedhjet për organet e qeverisjes vendore në një situatë që përmbush kriteret për marrjen e masave të jashtëzakonshme. Edhe në një rast të tillë, Presidenti ka nevojë për një bazë ligjore të posaçme – ad hoc – për të shtyrë zgjedhjet. Anulimi i zgjedhjeve është i mundur vetëm në situata që përmbushin kërkesat për deklarimin e një gjendjeje të jashtëzakonshme. Megjithatë rregullat kushtetuese të zbatueshme për situatat e jashtëzakonshme në këtë rast nuk janë ndjekur. Nuk pati gjithashtu as konsensus politik, që do të kish bërë të mundur krijimin e një baze ligjore Ad Hoc.”
Ndërsa për bojkotin e atyre zgjedhjeve nga forcat opozitare mbërriti në përfundimin se nuk mund të pengojë mbajtjen e zgjedhjeve të rregullta. Ndryshe, këto parti do të kishin mjetin e pengimit të çdo zgjedhjeje.
Në një kohë kur Komisioni Venecias është shprehur njëherë për zgjedhjet e 30 Qershorit pritet me interes argumentimi Gjykatës Kushtetuese përse ishte në pamundësi vendimmarrje dhe çfarë pyetjesh do t’i dërgojë Venecias.
