Vrasësi i Caroline Crouch, piloti 32-vjeçar Charalambos (Babis) Anagnostopoulos kaloi natën e tij të parë në burgun e Koridhalosit. Mediat greke kanë bërë me dije se Anagnostopoulos kapërceu pragun e burgut Korydallos pak pas orës 20.00 dhe sipas informacioneve, ai nuk është vetëm në qeli, por me tre persona të tjerë.
Njëri është një oficer burgu që vuan një dënim për drogë, i dyti për kontrabandë dhe i treti gjithashtu për drogë. Të mërkurën në mëngjes ai u takua me drejtoreshën e burgut Mary Stefi, procedurë standarde kjo për të gjithë të paraburgosurit.
Sipas informacioneve nga Newsbomb.gr, ai kërkoi një punë sepse dëshiron ta kalojë kohën e tij. Po ashtu ai ka kërkuar që të përdorë telefonin e burgut, por ende se ka shfrytëzuar të drejtën e një telefonate.
Babis Anagnostopulos u arrestua disa ditë më parë, më shumë se një muaj pasi mbyti të shoqen dhe u mundua ta fshihte krimin, duke sajuar një grabitje. Piloti vrau të shoqen pasi kjo e fundit i kishte kërkuar divorcin. Ai rrëfeu një histori të sajuar ku përfshiu dhe shqiptarët, por vetëm dy ditë më parë u zbulua se personi që qëndronte pas krimit të rëndë ishte vetë 32-vjeçari.
