9 muaj pas vrasjes së 39-vjeçarit Armando Baboçi në Durrës, policia ka arrestuar një 27-vjeçar të shpallur në kërkim. Në pranga ka rënë Anxhelo Boçi, ndaj të cilit rëndojnë akuzat e vrasjes me paramendim të kryer në bashkëpunim dhe armëmbajtje pa leje.
Boçi u përfshi në sherrin masiv që ndodhi më 18 Shtator 2021 në lagjen Nr.13 të Durrësit rreth orës 20:00 të mbrëmjes.
Në sherr u përfshinë të paktën 8 persona dhe nga sherri fillimisht me sende të forta e më pas me armë zjarri, mbetën të plagosur Armando Baboçi i cili ndërroi jetë më pas në spital, djali i tij Erald Gjini 19 vjeç dhe një person tjetër H.T. 23 vjeç.
Fillimisht dyshohet se konflikti ishte nxitur nga Erald Gjini, duke qëlluar me sende të forta një nga pjesëtarët e familjes Tatozi me të cilët kishin një konflikt të hershëm pronësie.
Fill pas kësaj në konflikt është përfshirë dhe i ati i 19-vjeçarit Armando Baboçi, i cili ka shkuar në ndihmë të së birit. Në atë kohë, policia ndaloi 6 persona të përfshirë në konflikt.
