Vaji i ullirit dhe aloe vera janë dy prej dhuratave më bujare të natyrës. Përdorimi i tyre në të mirë të organizmit është i pakufi. Të dy produktet janë të rekomanduara fort për hidratimin dhe përkujdesjen ndaj lëkurës. Aloe Vera e përthith shumë mirë vajin e ullirit.
Për më tepër, duke qenë se vaji i ullirit është i pasur me vitaminat E, A dhe K, ai është një pasuri më vete. Aloe vera nga ana tjetër është përshkruar prej shekujsh si ‘bima e përjetësisë.’ Sipas të dhënave, ajo është burim i vitaminave B, C, E dhe beta karotenit. Aloe vera është një burim shumë i pasur mineralesh dhe amino acidesh. Duke bashkuar vajin e ullirit me xhelin e aloe verës ju mund të prodhoni një solucion ushqyes për lëkurën.
Përgatitja
Për këtë ju nevojitet një gjethe e madhe e aloe verës dhe dy lugë gjelle me vaj ulliri. Përzieni xhelin e brendshëm të gjethes me vajin e ullirit në mikser dhe kremin përdoreni çdo mëngjes dhe në mbrëmje. Ky krem krejt natyral do t’i japë lëkurës shkëlqim dhe elasticitet. Për më tepër, ajo do të jetë e butë si e një bebeje.
Vlerat E Tjera Të Aloe Veras
Të dhënat e publikuara nga “The Journal of Environmental Science and Health”, të cilave u referohet AgroWeb.org, tregojnë se Aloe Vera ka vlera të fuqishme në betejën kundër baktereve, virozave dhe mykut. Këto veti e bëjnë këtë bimë të dobishme në pastrimin e organizmit nga toksinat dhe në fuqizimin e sistemit imunitar. Por këto nuk janë vlerat e vetme të bimës së aloe verës. Ajo bimë e mrekullueshme përmban 20 nga 22 amino acidet esencialë për të cilat ka nevojë organizmi i njeriut, por edhe acid salicilik që lufton inflamacionin dhe bakteret.
Përveç rolit të pastrimit të organizmit, Aloe Vera përqendrohet kryesisht tek largimi i toksinave nga stomaku, veshkat, shpretka, tëmthi dhe mëlçia. Aloe vera forcon sistemin tretës dhe ofron një alternativë të shëndetshme për ata që vuajnë nga artriti. Mënyra më e rekomandueshme është që të pini lëngun e bimës, të cilën mund ta rrisni vetë në shtëpinë tuaj. Kombinojeni xhelin në lëngjet tuaja të preferuara të frutave dhe perimeve ose pijeni veçmas. Sigurohuni që të përdorni xhel të pastër që nxirret nga pjesa e brendshme e gjetheve të bimës. Shija e xhelit mund të jetë pak e athët dhe e hidhur, por mund ta përzieni me pak mjaltë dhe të përfitoni vlera të shumëfishta./AgroWeb
