Sekretari amerikan i Shtetit, Antony Blinken, ka mbërritur në Tel Aviv për bisedime me kryeministrin izraelit, Benjamin Netanyahu në lidhje me armëpushimin e arritur javën e kaluar, pas 11 ditësh luftime në Gaza dhe Izrael mes forcave izraelite dhe militantëve palestinezë.
Në anën tjetër Blinken do të mundohet të fillojë një fluks të menjëhershëm të ndihmave humanitare në Rripin e Gazës.
Presidenti Joe Biden njoftoi se ai po dërgonte Blinken në rajon për ato që do të jenë bisedimet personale të nivelit më të lartë të administratës së tij mbi krizën që shpërtheu në fillim të këtij muaji dhe që u mori jetën më shumë se 240 personave dhe shkatërroi qindra shtëpi, dukë lënë të pastrehë më shumë se 40 mijë persona.
Departamenti i Shtetit tha se Blinken do të vizitojë Izraelin, Bregun Perëndimor, Jordaninë dhe Egjiptin në një udhëtim që vjen ndërsa administrata është përballur me kritika të gjera për reagimin e saj fillestar ndaj dhunës vdekjeprurëse.
Diskutimet e Blinken me kryeministrin izraelit Benjamin Netanyahu, presidentin palestinez Mahmoud Abbas, presidentin egjiptian Abdel Fattah el-Sissi dhe mbretin jordanez Abdullah II do të përqëndrohen në forcimin e armëpushimit, dërgimin e ndihmës urgjente në Gaza, duke i dhënë fund dhunës brenda-komunale në qytetet izraelite dhe hedhjen e bazave paraprake për një kthim në bisedimet e paqes.
