Kryeqyteti i Shqipërisë është bërë “teatër” i demonstrimit të radhës së Forcave të Armatosura Shqiptare në bashkëpunim me Forcat e NATO-s, në kuadër të stërvitjes “Defender Europe 21”.
Entuziazmi dhe kërshëria ishin kryefjalë e ecejakeve të qytetarëve të Tiranës që ushqyen kuriozitetin e tyre duke prekur nga afër armatimet dhe logjistikën ushtarake të ekspozuar në sheshin “Nënë Tereza”, ku ndër të tjera dhe u demonstrua forca e Aleancës së Atlantikut të Veriut përmes një ushtrimi ushtarak, i cili përfshinte aksione nga qielli dhe toka.
Agjencia Telegrafike Shqiptare ndoqi nga afër takimin e qytetarëve të kryeqytetit me forcat e armatosura amerikane dhe shqiptare që mbushën sheshin përpara kampusit qendror me konture të gjelbërta ushtarake, me armatimet më të fundit si dhe helikopterët “Black Hawk”.
Disa ushtarakë amerikanë u shprehën se Shqipëria është një vend shumë i bukur, ku me kënaqësi do të riktheheshin për pushime.
“Na pëlqen shumë. Na pëlqen absolutisht shumë. Pamje si këto nuk gjenden në Amerikë. Peizazhi dhe pamjet janë të mrekullueshme. Njerëzit janë shumë të këndshëm dhe miqësorë dhe ne e vlerësojmë shumë këtë”,- tha njëra prej ushtarakeve të SHBA për ATSH-në.
E pyetur nëse do ta vizitonte Shqipërinë si turiste, ajo theksoi se “absolutisht po”. “Ushqimi këtu është i mrekullueshëm. Na pëlqen vërtet shumë. Sinqerisht, ju faleminderit shumë”,- tha ushtarakja amerikane.
“Ne vizituam kalanë atje lart në kodër dhe që ishte diçka vërtet zbavitëse. Po, padyshim që do të vija për pushime në Shqipëri”,- tha një tjetër ushtarake.
“E dua shumë Shqipërinë, i adhuroj gatimet, motin, malet. Është vend shumë i bukur. Patëm mundësinë të vizitonim kalanë. Më pëlqeu shumë përvoja e ngjitjes nëpër shkallët e gurtë. Ishte fantastike. Absolutisht po. Do të kisha uruar madje që të mund të qëndroja këtu”,- tha për ATSH një ushtarake tjetër.
Gerstner, një prej ushtarakëve në sheshin “Nënë Tereza” u shpreh për ATSH-në se, “stërvitja “Defender 21″ është shumë e rëndësishme për të forcuar bashkëpunimin mes forcave të armatosura të Atlantikut të Veriut. Ndërveprim që na mundëson të punojmë së bashku, është shumë i rëndësishëm, pasi na mundëson të mësojmë disa prej rregullave modeleve të tjera ushtarake, si dhe të punojmë me vendet partnere. Kështu ne patëm mundësi të flasim dhe bashkëpunojmë për stërvitjet e ardhshme, madje edhe për stërvitjen aktuale”.
“Shqipëria është vend i bukur. Ne patëm mundësinë të stërviteshim me forcat ajrore shqiptare. Shkuam në Bizë, në veri të Tiranës, nëpër zonën bregdetare. Është vend shumë i bukur. Po, në fakt unë u takova me një udhërrëfyes turistik dhe do të më pëlqente shumë të kthehesha sërish si turist këtu bashkë me familjen time. Është vend i bukur”,- tha Gerstner.
Demonstrimet vijnë në kuadër të stërvitjes, “Defender Europe 2021”, që po zhvillohet prej 4 majit në vendin tonë dhe që është më e madhja në 3 dekadat e fundit. Me anë të kësaj stërvitje po demonstrohen aftësitë ndërvepruese të Shteteve të Bashkuara me ushtritë partnere të NATO-s, për sigurinë në Ballkanin Perëndimor dhe rajonet e Detit të Zi.
Stërvitja “Defender 21”, po kryhet në bazat ushtarake të Bizës, Kuçovës, Pashaliman, Farkë, Rinas, Durrës dhe Zall-Herr. Stërvitja “Defender Europe 21” zhvillohet në kuadër të bashkëpunimit me palën amerikane dhe është në vazhdën e partneritetit të fortë strategjik që vendi ynë ka me SHBA-në, në fushën e sigurisë dhe mbrojtjes.
Komanda e Ushtrisë Amerikane në Europë (USAEUR) do të drejtojë paketën e stërvitjeve të koduar “Defender Europe 21” dhe pjesë e kësaj pakete do të jetë pjesëmarrja e forcave të vendeve aleate dhe partnere, si: Kanadaja, Bosnjë dhe Hercegovina, Kroacia, Greqia, Kosova, Mali i Zi, Maqedonia e Veriut, Britania e Madhe, Çekia, Hungaria, Rumania, Bullgaria, Gjeorgjia, Turqia etj.
