Selia e PD-së po qëndron në një heshtje të madhe pas disfatës së marrë në këto zgjedhje duke mos arritur të mposhtë Edi Ramën dhe PS-së. Mësohet se kryedemokrati Lulzim Basha është në zyrën e tij prej orësh dhe se atë e kanë takuar Jorida Tabaku dhe drejtuesi i fushatës, Alfred Rushaj.
Në mesditën e sotme kryedemokrati Lulzim Basha ka pasur një takim të paktën 30 minuta me kreun e PDIU Shpëtim Idrizi.
“S’kanë mbaruar zgjedhjet akoma”. Këtë deklaratë Idrizi e bëri ndërsa ishte duke hyrë në selinë e PD-së, pasi do të takohej me kreun e demokratëve, Lulzim Basha.
Gjatë ditës së sotme në zyrën e Bashës kanë qenë edhe sekretari i PD Gazment Bardhi i cili që prej nisjes së fushatës ishte zhvendosur në qytetin e Elbasanit.
Basha po konsultohet me bashkëpunëtorët e tij në lidhje me rezultatin e zgjedhjeve parlamentare dhe mbi të gjithë për vendimin që do të marrë.
PD është në pritje të rezultatit përfundimtar për të dhënë një vlerësim mbi procesin zgjedhor. Edhe pse ka një rritje të votave në krahasim me vitin 2017, PD-ja nuk arriti që t’i fitonte këto zgjedhje.
