Vetëm 3 ditë na ndajnë nga zgjedhjet e shumëpritura parlamentare të 25 prillit, ku çdo qytetar shqiptar do u drejtohet kutive të votimit për të zgjedhur liderin që duan të qeverisë vendin.
Ndryshe nga vitet e tjera këto zgjedhje priten të kenë një garë të ethshme dhe disi të vështirë për shkak të pandemisë së COVID-19 nen masat e Komitetit Teknik te Eksperteve.
Partia Socialiste me në krye liderin Edi Rama kërkon mandatin e tretë për të qeverisur sërish vendin dhe Partia Demokratike me lider Lulzim Basha kërkon të vije ne pushtet pas 8 vitesh ne opozitë.
Siguria dhe rendi gjatë zgjedhjeve do të garantohet nga policia e shtetit, e cila ka një plan për menaxhimin e këtij procesi të rëndësishëm zgjedhor.
Mëngjesin e 25 prillit do jenë mbi 7500 efektive policie të cilët do të angazhohen për mbarëvajtjen e zgjedhjeve.
Drejtori i Rendit Publik, Ylli Vasili, tregon se cilat kanë qenë hapat e ndjekur që prej dhjetorit të vitit 2020, nga policia.
Vasili: Hapi i parë ka qenë trajnimi në terren. Hapi i dytë është i mbarëvajtja e fushatës zgjedhore. Faza e tretë është garantimi i rendit gjatë votimit dhe faza e katërt do të jetë garantimi i sigurisë gjatë procesit të numërimit të votave.
Përsa i përket zonave të nxehta, Vasili tha se nuk ka qarqe prioritare, por janë marrë të gjitha masat dhe janë garantuar mjetet që procesi të mos ketë probleme.
Përveç policisë në terren do jetë edhe SPAK në gatishmëri në të 12 qarqet e vendit nëse do të shfaqen probleme që klasifikohen si krime zgjedhore. SPAK është përgjegjës për hetimin e krimeve zgjedhore në të 12 qarqet e vendit për korrupsion aktiv dhe pasiv në procesin zgjedhor.
Forcat e Armatosura kanë marrë në mbrojtje Gjykatën Kundër Korrupsionit dhe Krimit të Organizuar dhe SPAK. Ushtria gjithashtu ka marrë në ruajtje edhe objekte të tjera siç janë Kryeministria, Ministritë, rezidencat e trupave diplomatike, ku do të qëndrojnë në gatishmëri deri në përfundimin e plotë të procesit zgjedhor./ Alpenews.al
